Me një fjalor aspak të përshtatshëm, në nivel rruge dhe tepër i indinjuar pas vendimit të Byrosë së Kuvendit, deputeti socialist që u bë molla e sherrit në seancën e kaluar ka treguar forcën para Kryesisë së Kuvendit. Braçe tha se në mbledhjen e Byrosë, anëtari i PD-së, Edmond Spaho e ka kërcënuar dhe për këtë arsye i është përgjigjur ‘sfidës’.
“Jam sulmuar nga 2 njerëz që nuk ishin në sallë fare. Ishin në kafen e parlamentit. Nga ajo sallë nuk ka ngelur shqiptar familjarisht i pa përgojuar nga ky njeri (Berisha). Në Byro, Spaho kërcënoi që nëse nuk merren masa do ketë përkeqësim në plan personal. Kë kërcënojnë këta?! Në plan personal, kë kërcënon?! Le ta provojë Edmond Spaho dhe kushdo, këtu jam. Nëpër rrugët e Tiranës dal”, tha Braçe.
Sipas tij vendimi i Byrosë që e përjashton me 5 ditë nga Kuvendi i Shqipërisë është shqetësues duke theksuar se po legjitimohet një regjim i dhunshëm, me fyerje, sharje dhe sulme.
“Pas këtij vendimi më shqetëson fakti që po legjitimohet një regjim i dhunshëm, fyerje, sharje, sulm. Regjim i dhunshëm që kryesohet nga Sali Berisha. Ky regjim që duhet të merrte fund, tani që parlamenti ka marrë një fytyrë tjetër dhe është në proces vetpastrimi, dhunuesi falet, i dhunuari dënohet. E rëndë për mua si deputet i Kuvendit të Shqipërisë. Nëse vijon historia që t’i legjitimohet Sali Berishës çdo fyerje, kjo Byro do ketë punë pas çdo seance. Nuk do toleroj asnjë që të adresojë fyerje ndaj meje. Berisha fyeu nga nëna në seancën e kaluar. Ky është ligjërim politik? Sali Berisha shpif. Unë nuk jam brenda maxhorancës për të pranuar çdo lloj vendimi. Kush është e padrejtë, është e padrejtë.”- tha Braçe.
Gjithashtu Braçe ka sqaruar edhe për atë që sipas tij ndodhi në seancën e së enjtes së 7 Prillit, ku pati përplasje me disa prej deputetëve të PD.
“Kjo është historia për fat të keq e këtij parlamenti edhe në ditët e sotme. Keni qenë dëshmitarë. Rregullorja ndalon cilindo t’i ndërhyjë drejtuesit të seancës dhe të ndërpresë folësin. Ndalon cilindo të merret me jetën private e personale. Ndalon cilindo të adresojë fyerje e sharje. Çdo gjë ka nisur me Arben Ristanin, i jam përgjigjur unë, ka vijuar me Sali Berishën, i jam përgjigjur unë po prapë, ka vijuar me ndërhyrjen e dhunshme të Edi Palokës dhe pas ndërprerjes së seancës me sulmin fizik të një deputeti tjetër.”- tha Braçe.
