Deputeti i Partisë Socialiste, Rakip Suli, ka deklaruar se do të shkojë në Gjykatën Kushtetuese lidhur me akuzat e opozitës për mandatin e tij.
Ai ka thënë se nuk ka asnjë faj ndaj akuzave që ka ngritur Partia Demokratike. “Si deputet, hapi që kam marrë, është që të mos i lë vënd opozitës të ngrejë akuza kot” ka thënë Rakip Suli.
Pritet që Rakip Suli t`i dërgojë një shkresë zyrtare kryetarit të Kuvendit, Ilir Meta për vendimin e tij lidhur me mandatin në Gjykatën Kushtetuese.
Duke folur para nisjes së seancës plenare, Suli i është drejtuar opozitës me vargjet e një kënge jugu “Nuk janë halle, po sebepe, turpin e paçi për vete”.
“Unë do t’i kërkoj deputetëve të votojnë për ta cuar cështjen në Kushtetuese, që mos të kenë më mundësi kryetari i SHQUP-it, për të nxjerrë pretendime për reformën në drejtësi. Po ngushtohet laku ditaditës, me votimin e reformës do të dalin në pah ato abuzime që kanë bërë prej 8 vitesh e i tremben burgut, që nga kreu i SHQUPit dhe e gjithë skuadra.
Sipas Sulit, i duhet lënë Kushtetuese, edhe pse ai shpreh bindjen se nuk do i hiqet mandati, pasi nuk është në asnjë lloj konflikti interesi. “Unë po e coj në Kushtetuese, pasi nuk dua t’i lë hapësirë opozitës për të nxjerrë pretendime që ne nuk ulemi për të diskutuar për reformën. Ka tre vjet PS që ka bërë reforma dhe mendoj që vula e reformave është ajo në drejtësi, që të nxjerrë si i kanë vënë politikanët pasurinë, dhe të dalin në pah abuzimet që nga ishkryeministri dhe Basha” tha ai.
Në seancën e kaluar parlamentare opozita bllokoi foltoren e Kuvendit lidhur me rrëzimin e kërkesës së saj për mandatin e Sulit nga mazhoranca. Deputeti i PS-së Suli ka vepruar ashtu si edhe deputetja Valentina Leskaj për ta çuar vet mandatin e tyre në Gjykatën Kushtetuese.
Një vit më parë opozita iu drejtua Gjykatës edhe për Koço Kokëdhimën.
