Teksa skandali i “Letrave të Panamasë” ka përfshirë gjithë botën, Boldnews.al mëson se për Shqipërinë janë plot 20 mijë dokumenta të nxjerra nga studio ligjore “Mossack Fonseca”.
Dokumentat pritet të zbardhin transaksionet e dyshimta financiare nga Shqipëria drejt zonave offshore.
Burime konfidenciale konfirmojnë për Boldnews.al se në listën e personave të përfshirë janë politikanë të nivelit të lartë, biznemenë, bankierë por edhe njerëz të lidhur me botën e krimit.
Një ditë më parë, Projekti për Raportimin mbi Krimin e Organizuar dhe Korrupsionin (OCCRP) konfirmoi se brenda 2 javësh pritet të publikohen informacionet për Ballkanin.
Redaktorja e OCCRP, Miranda Patrucic i pohoi Zërit të Amerikës, se mund të priten informacione konkrete për të gjitha vendet e rajonit të Ballkanit, përfshirë Shqipërinë, Kosovën dhe Maqedoninë.
“Sigurisht. Dokumentet dhe artikujt janë për çdo vend dhe sigurisht ato janë të ndryshme në varësi të sasive të parave ose personave të implikuar”, tha ajo.
Ndërkohë burime për Boldnews.al pranë Prokurorisë së Përgjithshme në Tiranë u shprehën se “po bashkëpunohet me institucionet e tjera ligjzbatuese për të qartësuar situatën mbi përfshirjen e mundshme në çështjen “Panama Papers” të kompanive apo shtetasve shqiptarë e të huaj që ushtrojnë veprimtari tregtare në territorin e Republikës së Shqipërisë”.
Prokurorët janë urdhëruar të ndjekin publikimin në vazhdim të të dhënave nga konsorciumi i gazetarëve ndërkombëtarë që disponon 11 milionë dokumentet e kompanisë ligjore panameze “Mosak Fonseka”, e cila bënte regjistrimin e kompanive “offshore” nga e gjithë bota.
Boldnews.al konfirmoi gjithashtu se ka një angazhim edhe të Drejtorisë së Parandalimit të Pastrimit të Parave dhe Sektorit Kundër Krimit Ekonomik në Policinë e Shtetit.
Deri më tani, referuar një gazete izraelite, një prej kompanive që operojnë në Shqipëri dhe që lidhet me skandalin e Panamasë është një subjekt tregtar që ushtron aktivitetin në fushën e hidrokarbureve.
Ajo është kompania e ngjyrosjes së karburanteve “GFI Technologies”, e cila është në pronësi të shqiptarit shumë të përfolur Ismail Mulleti.
“Zëri i Amerikës”, raportoi një ditë më parë se “policia shqiptare ka verifikuar hyrje-daljet nga Shqipëria të Ismail Mulletit dhe izraelitit Assaf Halkin. Mulleti rezulton që të ketë dalë nga vendi pak javë më parë, në mars, ndërsa Halkin në muajin shkurt. Ata që të dy kanë realizuar shumë udhëtime nga dhe drejt Shqipërisë, shpesh dhe me avionë charter”.
