Anijet e para me migrues nga ishulli grek Lesbos, arritën të hënën në portin detar turk në Dikili.
Largimi i migruesve nga ishulli Lesbos të hënën, shënon fillimin e zbatimit të planit kundërthënës për të frenuar migrimet e paligjshme në Evropë, një plan i kritikuar nga grupet e të drejtave të njeriut.
Turqia është duke u përgatitur për kthimin e qindra migruesve, sipas një marrëveshjeje me Bashkimin Evropian.
Mijëra migrues po mbaheshin në ishullin Lesbos.
Zyrtarët turq thanë se presin rreth 500 migrues të arrijnë të hënën në Dikili. Më pas, miqësuesit nga ishuj të tjerë të Egjeut do të dërgohen atje po ashtu.
Sipas marrëveshjes ndërmjet Bashkimit Evropian dhe Turqisë, ata që arrijnë në rrugë të paligjshme në brigjet e Greqisë, do të kthehen në Turqi, përveç në rastet kur përmbushin kriteret për të fituar strehim.
Marrëveshja synon të zhbëj kontrabandën fitimprurëse me migrues.
Organizata për të drejtat e njeriut, Amnesty International, e ka akuzuar Turqinë për përzënien e grupeve të migruesve sirianë, pohime këto të hedhura poshtë nga Turqia.
Boris Cheshirkov, zëdhënës i Agjencisë së Kombeve të Bashkuara për refugjatë, tha se ka ende “mangësi dhe boshllëqe” si në Turqi dhe në Greqi që duhet të zgjidhen.
Sipas marrëveshjes, Turqia merr mbi 3 miliardë dollarë ndihmë, përfiton udhëtimin pa viza për shtetasit turq, si dhe një mundësi të re për anëtarësimin e vendit në Bashkimin Evropian.
