Policia e Beratit dhe ajo e Kuçovës kanë bashkëpunuar për të arrestuar 44-vjeçarin Artur Hoxha nga Kuçova, kultivues droge që dispononte dhe armë.
Sipas policisë, arrestimi i tij u bë pasi gjatë kontrollit të ushtruar nga forcat e policisë në banesën e tij në lagjen “1 Maj” Kuçovë, iu gjetën 930 fara bimë narkotike Canabis Sativa; 6 bimë narkotike në vazo me gjatësi 15 cm, 15 gr lëndë natkotike marijuanë si dhe 9 pako municione me 630 copë fishek model 54 kalibër 7.62 mm.
Materialet i kaluan Prokurorisë së Rrethit Gjyqësor Berat, për veprat penale “Prodhimi dhe shitja e narkotikëve”, “Kultivimi i bimëve narkotike” dhe “Prodhimi dhe mbajtja pa leje e armëve luftarake dhe e municionit”, parashikuar nga nenet 283/1, 284, 278/3 të Kodit Penal.
