Vizita e Komisionerit Johanes Hahn, e ka detyruar kryeministrin Edi Rama që të ulet në një tryezë me kryetarin e opozitës Lulzim Basha.
Për këtë Rama i ka dërguar sot një letër publike Bashës ku i kërkon një takim mes dy forcave politike. Duke e cilësuar si një forum të përbashkët, Rama shprehet se ky lloj komunikimi do të ishte më produktiv për të diskutuar sy më sy për çështje që kanë interes madhor kombëtar.
“Zoti Basha, nëpërmjet kësaj letre (të hapur edhe për publikun), dua të formalizoj ftesën time të djeshme publike, bërë gjatë konferencës për shtyp me Komisionerin Hahn, që të ngremë bashkërisht, duke u nisur nga formati i suksesshëm i Dialogut të Nivelit të Lartë, një forum mes shumicës dhe pakicës; pa prezencë ndërkombëtare.”– thuhet në letër.
Sipas kryeministrit Rama, klasa politike duhet të japë një provë ndaj qytetarëve dhe ndërkombëtarëve, se janë të gatshëm për tu dakordësuar mes tyre.
“Le të provojmë t’u japim qoftë njerëzve tanë e qoftë partnerëve të këtij vendi, provën e një vullneti të përbashkët për t’i dhënë mosdakordësisë politike mes palëve, një përmasë kaq të munguar civilizimi.”– u thuhet në letër.
Në fund, Rama e lë në dorën e kryeopozitarit për të vendosur modalitetet e takimit, duke i ngritur një pyetje:
“Paraprakisht dëshirojmë të dimë nëse edhe ju e dëshironi, këtë përpjekje të re për komunikim mes nesh. Ne jemi gati, po ju a jeni gati?”
