Një çift të moshuarish janë dhunuar barbarisht nga dy të rinj që kanë hyrë për të vjedhur në shtëpinë e tyre, në Shkallnuer të Durrësit, mesnatën duke u gdhirë data 24 Mars 2016.
Hazbi Kryemadhi dhe Mynevere Kryemadhi, përkatësisht 80 dhe 76 vjeç janë zgjuar të tmerruar, pasi dy djem të moshës së re i kanë lidhur me çarçaf dhe i kanë goditur me mjet të fortë në pjesë të ndryshme të trupit.
Gjatë kësaj ngjarje, e cila ende nuk është bërë publike nga Policia, i moshuari 80-vjeçar Hazbi Kryemadhi ka humbur ndjenjat dhe është shtruar në gjendje shumë të rëndë në Spitalin Rajonal të Durrësit. Ndërsa bashkëshortja e tij, megjithëse e dëmtuar rëndë, ka arritur të tregojë për policinë dhunën e ushtruar ndaj dy të moshuarve.
Në deklarimet e dhënë nga spitali për oficerët e Policisë Gjyqësore, 76-vjeçarja Mynevere Kryemadhi tregon se, rreth orës 01.30, ajo ka ndjerë dhimbje të forta në krah. Është ngritur e frikësuar dhe ka dalluar, në errësirë, siluetën e dy djemve të rinj, njëri prej të cilëve vijoi ta godiste me një mjet të fortë. E moshuara ka humbur ndjenjat dhe, pak momente më vonë, pasi është përmendur, e ka parë veten të lidhur në këmbë e duar me çarçaf. Në gjendje të rënduar, siç ishte, ka hedhur vështrimin bashkëshorti i saj, i cili flite në krevatin në krah dhe ka dalluar që ai ishte i gjakosur dhe nuk reagonte. Edhe Hazbiu ishte i lidhur me çarçaf, ndërkohë që dy agresorët po kërkonin në sirtarë dhe komodina për para.
E moshuara ka vijuar të qëndrojë e palëvizur, e frikësuar se dy personat që kishin hyrë në shtëpinë e saj mund ta vrisnin dhe ka ndjekur veprimet e tyre.
Pasi kanë arritur të gjejnë rreth 150 mijë lekë të reja, hajdutët janë larguar, duke u siguruar më parë të nxirrnin jashtë përdorimit edhe telefonin e familjes së të moshuarës.
Pasi agresorët kanë dalë me shpejtësi nga shtëpia, e moshuara, pavarësisht se e gjakosur dhe e dëmtuar në gjymtyrë, ka arritur të dalë jashtë shtëpisë, ku më tej ka njoftuar edhe Policinë për gjithçka ka ndodhur në dhomën e çiftit Hazbi dhe Mynyre Kryemadhi.
