Pista kryesore në të cilën është përqendruar grupi hetimor për të zbardhur vrasjen e Mirash Djaloshit duket se është konflikti në familje.
Ai u gjet i masakruar me çekiç në kokë mëngjesin e së premtes në fshatin Shkallë të Shijakut.
Burime nga grupi hetimor bëjnë më dije se megjithëse është hetuar për konflikte të mundshme të viktimës me persona të tjerë, ka rezultuar se nuk ka pasur ndonjë të tillë. Pas kësaj, hetimet janë drejtuar drejt konflikteve të mundshme që mund të ketë pasur i ndjeri në familjeje, sidomos me djalin e tij Ardianin.
Mësohet se kohët e fundit, 54-vjeçari kishte nisur grindjet me të birin, ku i kërkonte që të fillonte punë. Djali i madh i familjes mësohet se para pak muajsh kishte dalë nga burgu, ku vuajti dënimin për veprën penale të vjedhjes.
Një arsye tjetër që i ka shtyrë hetimet drejt konfliktit familjarë ka qenë edhe dëshmitë kontradiktore që kanë dhënë familjarët.
Megjithëse familjarët kishin deklaruar se ai kishte dalë nga shtëpia rreth orës 19:00 dhe nuk është kthyer më, ata nuk kanë mundur të justifikojnë prezencën e celularit të të ndjerit në shtëpi.
“Kemi hetuar dhe pyetur me dhjetëra persona rreth karakterit të viktimës, por rezulton se ka gëzuar respekt në fshat. Kemi verifikuar dyshimet për ndonjë konflikt të mundshëm, por rezulton person i shoqërueshëm dhe pa konflikte. Dyshimet tona kryesore janë fokusuar te konflikti familjar, por paralelisht po verifikojmë edhe në drejtime të tjera”, u shprehën burime nga grupi hetimor.
