Një tjetër krim i rëndë godet kryeqytetin shqiptar brenda pak orësh. Mësohet se një person, i identifikuar si Ajet Zeqaj nga Tepelena është ekzekutuar me armë zjarri në zonën e ish-bllokut, në afërsi të sheshit “Wilson”.
Dyshimet e para janë për një atentat të mirëmenduar pasi është përdorur një armë me silenciator. Autori i krimit i ka ngritur pritë Zeqajt pranë një rrugice, në afërsi të një lokali bastesh.
Viktima ka qënë duke luajtur bilardo bashkë me një shok dhe në momentin që ka dalë ai është qëlluar për vdekje me dy plumba, ku njëri ishte pas koke.
Mësohet se viktima kishte 20 ditë që kishte ardhur nga Franca, ndërkohë që më herët ka qënë ish efektiv policie. Ngjarja ka shokuar qytetarët ndërkohë që forca të shumta policie ndodhen në vendngjarje.
Për të zbardhur dinamikën e vrasjes, policia ka shoqëruar shokun e Zeqajt në cilësinë e dëshmitarit okular.
