Komisioni i Venecias ka ndryshuar qëndrim duke zmbrapsur kërkesat e Partisë Demokratike në opinionin e saj final. Komisioni ka publikuar 8 paragrafë dhe ka shtuar një tjetër duke ndryshuar disa fjali në disa paragrafë.
Ky publikim i fundit i Komisionit të Venecias nuk i jep zgjidhje çështjeve më të nxehta ku ndahen palët për reformën.
“Venecia” ka eleminuar disa nga kërkesat e shprehura së fundmi nga Partia Demokratike. Paragrafi 8, pavarësisht se në thelb ngelet i pandryshuar nga opinioni paraprak në fund të tij, ka dy fjali të cilat qartësojnë edhe qëndrimin e “Venecias” për çështjet e debatuara. “Komisioni i Venecias është përpjekur të shmangë komentet përsëritëse nga opinioni i ndërmjetëm, që kishin të bënin me çështje të cilat janë eliminuar nga teksti i rishikuar. Atje ku Komisioni i Venecias ka kritika të forta për draftamendamentet e rishikuara, ky kriticizëm është i shprehur në opinionin final”, shtohet në paragrafin 8 nga “Venecia”. Në pikat e mësipërme, në të cilat “Venecia” ka vendosur të qartësojë qëndrimin e saj, nuk flitet për asnjë nga kërkesat që përfaqësuesit e opozitës shprehën pak ditë më parë në Komisionin e Posaçëm për Reformën në Drejtësi.
Nënkryetari i këtij Komisioni, Eduard Halimi, theksoi se PD ishte kundër ngritjes, ekzistencës dhe funksionimit të Këshillit të Emërimeve në Sistemin e Drejtësisë, pikë që nuk është mbështetur nga “Venecia” në opinionin final të saj. PD- ja u shpreh edhe kundër ngritjes së strukturës së Gjykatës së Lartë. Ndarja me dy gjykata, Gjykata e Lartë për çështjet civile dhe penale, dhe Gjykata e Lartë Administrative. Edhe për këtë pikë, e cila gëzonte edhe mbështetjen e LSIsë, Komisioni i Venecias është shprehur kundër.
Aktualisht, përfaqësuesit e forcave politike nuk kanë nisur shqyrtimin e opinionit të Komisionit të Venecias, pasi kanë qenë të ndara edhe për leximin që duhej bërë për draftin paraprak. Përfaqësuesit e opozitës janë për një lexim politik të draftit, ndërkohë që Partia Socialiste ka kërkuar që diskutimi të bëhet në nivel ekspertësh.
Çështjet për të cilat “Venecia” kërkon dakordësinë e palëve deri në miratimin e reformës, është formula e zgjedhjes në institucionet e drejtësisë.
