Një pjesë të kohës së tij gjatë ceremonisë para nisjes së konkursit për shkollën e Policisë, Ministri i Brendshëm, Saimir Tahiri ja ka kushtuar sistemit gjyqësor. Tahiri ka sulmuar gjykatat dhe unionin e gjyqtarëve duke u nisur nga një rast flagrant.
Ai risolli në memorie rastin kur një gjyqtar në Vlorë nxori të lirë një person që ishte arrestuar me armë në brez, duke shtuar se unioni e mori në mbrojtje.
“Drejtësia e pabarabartë në fakt është më keq se mos kesh drejtësi fare. Shumë njerëz në Shqipëri kanë arritur ta mendojnë kështu. Para pak ditësh denoncova një gjyqtar në Vlorë që kishte nxjerrë nga burgu një person që nga policia ishte arrestuar me armë në brez. Aq merak e kishte ky gjyqtar lirimin e këtij personi sa dhe vendimin e Gjykatës Kushtetuese të cilin e ka bërë motiv për ta liruar, e ka zbatuar dy ditë para se të hynte në fuqi. Pashë që reagoj dhe një Unioni i Gjyqtarëve. Në fakt po pyesja veten, mirë gjyqtari, se mbase ka hallet e veta, po këta të unionit që i dolën në mbrojtje, kanë kalendar?”, tha Tahiri.
Po kështu Tahiri përmendi edhe tragjedinë e Gërdecit, duke deklaruar se një prej përgjegjësve të vdekjes së 25 personave është sot në një vizitë jashtë Shqipërisë për të folur për reformën në drejtësi.
“Sot në fakt, mbushen tetë vjet nga një ngjarje që shokoi rëndë, jo vetëm Shqipërinë, por edhe ndërgjegjen kolektive të qytetarëve. Ka vite burg në kurriz të atyre që ishin përgjegjës për atë ngjarje më pak sesa viktimat e asaj ngjarje. Dhe ndërkohë një ndër autorët është sot në një vizitë jashtë Shqipërisë për të folur për reformën në drejtësi dhe për dekriminalizimin”, tha ai.
“Përtej kësaj, -vijoi ministri- unë respektoj çdo gjyqtar të ndershëm, çdo union që mbron interesat më të larta të publikut, por as respektoj dhe as do ndalojë së denoncuari publikisht çdo gjyqtar të korruptuar dhe çdo korporatë kriminale që bëjnë gjyqtarët me njëri-tjetrin në kurriz të qytetarëve. Gjyqtarë e Union Gjyqtarësh, pavarësinë, respektin e shoqërisë të mos e kërkojnë me deklarata, ku i dalin në mbrojtje njëri-tjetrit edhe kur janë gabim. Por, ta fitojnë duke shërbyer me dinjitet, ndershmëri dhe drejtësi për çdo qytetarë”, ishte mesazhi i Tahirit.
Unioni i Gjyqëtarëve: Sjelljet e politikanëve po intimidojnë trupën gjyqësore
Unioni i Gjyqtarëve ka reaguar mbi letrën që ministri i Brendshëm i ka dërguar presidentit Nishani, ku pretendohet se gjyqtari i Laurent Fucia ka favorizuar në vendim një person të akuzuar për amëmbajtje pa leje.
Bordi Drejtues i unionit të gjyqtarëve, ndërsa mbështet çdo përpjekje që ka për qëllim përmirësimin e sistemit, shpreh shqetësim deklaratat dhe veprimet të përfaqësuesve të politikës që sipas tyre nuk kanë për qëllim forcimin e pavarësisë së vendimarrjes së gjykatave dhe forcimin e parimeve themelore të funksionimit të shtetit ligjor.
Unioni vlerëson se “përsëritja e sjelljeve të tilla ka intimiduar gjithë trupën gjyqësore dhe e ka vendosur nën një presion sistematik gjatë ushtrimit të detyrës. Duke ju referuar rastit të gjyqtarit në gjykatën e Vlorës, Unioni i Gjyqtarëve thotë se vendimi nuk është përfundimtari, por nisja e një procesi penal. Unioni shpreh gatishmërinë për të kontribuuar në procesin e realizimit të reformës në drejtësi.
(Boldnews)
