“…duhet marrë në konsideratë edhe faktin se ai është dekoruar nga Presidenti i Republikës me medalje për punën dhe përkushtimin në edukimin e fëmijëve të krahinës së Gollobordës” këto kanë qenë fjalët e Kryetarit të Rrethit Gjyqësor Dibër Halil Vani, gjatë seancës për masën e sigurisë për mësuesin Agim Muca, i cili u la i lirë pasi rrahu 12 nxënës.
Në fillim të seancës, Vani theksoi se shtetasi Agim Muça është kallëzuar në Polici për dhunë ndaj të miturve, ndërkohë organi i akuzës kërkon ndëshkimin e tij për veprën penale për të cilën ai akuzohet.
“Dëgjuam me vëmendje akuzën, shtetasin Agim Muça dhe mbrojtjen e tij. Arrijmë në konkluzionin se ndalimi i këtij shtetasi është kryer konform ligjeve në fuqi. Po ashtu dosja në ngarkim të shtetasit Agim Muça ka mbërritur në Gjykatën e Rrethit Gjyqësor Dibër brenda afateve ligjore. Agim Muça nuk rezulton të ketë kryer më parë vepra penale si kjo që akuzohet apo të jetë dënuar nga organet e drejtësisë. Sipas Vanit, nuk ka prova e fakte të qenësishme që 63 vjeçari të ketë dhunuar nxënësit e shkollës “Orzhanov”
Më tej kreu i rrethit Gjyqësor Dibër Vani thekson se:
“Personi nën hetim nuk paraqet rrezikshmëri në marrjen e provave nga strukturat e specializuara. Nuk ka dyshime se shtetasi Agim Muça mund të largohet, kjo edhe për shkak të moshës që ka. Shtetasi Agim Muça nuk është përsëritës dhe as i dënuar më parë”, shtoi Vani gjatë ligjëratës së tij.
Ai mori në konsideratë faktin se Muça ka punuar shumë vite në sektorin e arsimit dhe se është dekoruar. “Shtetasi Agim Muça, tha gjyqtari Vani, rezulton të ketë qenë edukator për më shumë se 40 vjet. Ai është dekoruar për meritat e tij nga Presidenti i Republikës me medalje të ndryshme si ‘Mjeshtër i Merituar’ dhe ‘Naim Frashëri’, klasi Irë. Ndaj vendimi i gjykatës nuk ka vetëm qëllim ndëshkues, por edhe humanitar”, nënvizoi Vani. Sipas tij, masa më e përshtatshme është ajo e “arrestit shtëpiak”.
Megjithatë, hetimet për rastin po vazhdojnë. Ndaj mësuesit denoncuan prindërit e tri vajzave të mitura, të klasës së tretë dhe klasës së pestë të shkollës së fshatit, “Orzhanov”.
Ata pretenduan se fëmijët ishin dhunuar me shuplaka e më pas ishin goditur me dru zjarri nga mësuesi 63 vjeç. Rastin e dënoi edhe ministrja e Arsimit, Lindita Nikolla. Si dhe pati edhe reagime indinjate edhe në opinionin publik.
