Ish-Kryeministri Berisha e ka vlerësuar maksimalisht opinionin e Komisionit të Venecias që Byroja Kombëtare e Hetimit të mos jetë “nën sqetullën e Ramës”, por në varësi të Prokurorit të Përgjithshëm ose krejtësisht e pavarur, ndaj, ai i ka bërë thirrje opozitës që të kushtëzojë çdo marrëdhënie me qeverinë me votimin brenda dy javëve të Byrosë, sipas Komisionit të Venecias.
Në mesazhin e publikuar në rrjetet sociale sot, Berisha shkruan:
“Misioni Xhafa në kosh të plehrave!
Komisioni i Venecias gropos përfundimisht ëndrrën e Ramës për t’u bërë kryeprokuror dhe kryehetues i Shqipërisë!
Të dashur miq, Komisioni i Venecias dërgoi dje rekomandimet përfundimtare për reformën në drejtësi.
Ky komision nuk ndryshoi asnjë gërmë të vetme, rekomandimet e mëparshme të tij për Byronë Kombëtare të Hetimit, duke groposur kështu njëherë e përgjithmonë, ëndrrën e sëmurë të Edvin Kristaq Ramës për t’u bërë kryeprokuror dhe kryehetues i vendit.
Komisioni nuk pranon që BKH të jetë nën sqetullën e Ramës por rekomandon që të jetë institucion kushtetues në varësi të Prokurorit të Përgjithshëm ose krejtësisht i pavarur.
Rama është kategorik kundër këtij varianti, pasi e konsideron atë si një konspiracion për ta kalbur pesë dekada në burg për sarajet e Surrelit, pallatin në pajë pa asnjë faturë tatimore, bankare, ndërtimore, megaaferën korruptive të ÇEZ prej së paku 620 milionë euro grabitje, vjedhjet e mëdha në dogana dhe tatime prej 360 milionë euro, vjedhjen e mbi 320 milionë euro me konçesione me Beqjen dhe ndrikull Nushin dhe Ahmetajn…etj.
I bëj thirrje opozitës të kushtëzojë çdo marrëdhënie me qeverinë me votimin brenda dy javëve të BKH sipas Komisionit të Venecias.”
