Duke filluar nga data 1 prill e këtij viti, 2.147 punonjës të Policisë së Shtetit do të të përballen me një ulje të ndjeshme të pagave të tyre, për shkak të ndryshimit në grada. Sipas ndryshimeve të reja çdo polici do t’i zbriten së paku 5.500 lekë nga paga mujore.
Ka qenë Drejtoria e Financave në Drejtorinë e Përgjithshme të Policisë së Shtetit, e cila shpërndau këtë urdhër, bazuar në ligjin e ri për policinë. Sipas këtij ligji janë dy grada që hiqen nga sistemi: Grada “Nëninspektor” që u jepet atyre që mbarojnë Akademinë e Sigurisë për 2 vjet dhe grada e “Kryeinspektorit” që e mbajnë 2147 efektivë të policisë së shtetit.
Grada e fundit ndan edhe kurifin mes gradave të ulëta dhe atyre të mesme. Ligji i ri parashikon që të gjithë “Kryeinpsektorët” do të marrin gradën e “Inspektorit”, andaj edhe pagën që përkon sipas kësaj grade.
Për “Kryeinspektorin” paga bazë është 54 500 lekë (bruto), kurse për “Inspektorin” është 49 mijë lekë (bruto). 2.147 “Kryeinspektorët” do të marrin 5 500 lekë më pak prej 1 prillit të këtij viti. Ka qenë vetë kryeministri Edi Rama që ka premtuar në fushatën elektorale 2013 se me ardhjen në pushtet do t’i rriste me 70 % pagat e punonjësve të policisë së shtetit.
