Ministri i Brendshëm Sajmir Tahiri ka denocuar tek Presidenti i Republikës Bujar Nishani, gjyqtarin në Gjykatën e Vlorës, Laurent Fuçia, se ka liruar nga salla e gjyqit një të akuzuar për armëmbajtje pa leje.
Nëpërmjet një letre të dërguar Presidentit, që Boldnews.al e disponon, Tahiri shprehet se gjyqtari Fuçia nuk ka pranuar kërkesën e Prokurorisë e cila ka kërkuar arrest me burg për shtetasin Vasil Papa.
Sipas tij gjyqtari ka dhënë një vendim në kundërshtim me pikën 3 të nenit 228 të kodit të procedurës penale e ka liruar duke zbutur masën në detyrim paraqitje.
Ministri i Brendshëm thotë më tej se ky vendim vjen në një kohë kur policia ka shtuar kontrollet në të gjithë vendin për të parandaluar ngjarjet kriminale dhe për më tepër sipas Tahirit, ky veprim ndikon në dekurajimin e policisë në luftën kundër krimit.
Në këtë kontekst, Ministri Tahiri kërkon ndërhyrjen e Presidentit dhe Ministrit të Drejtësisë për të vënë në lëvizje KLD për të shqyrtuar zbatimin e ligjit dhe standartet e dhënies së drejtësisë.
Kjo është letra e dytë që Ministri i Brendshëm i dërgon presidentit Nishani, ku shfaq pakënaqësitë për vendimet e gjyqtarëve për personat që kapen me armë pa leje.
Megjithatë, Tahiri nuk i dërgoi asnjë letër presidentit për gjyqtarët që liruan deputetin socialist Armando Prengën.
Përgjigjet Manjani: Kemi të dhëna për mosfunksionim të Gjykatës së Vlorës
Edhe pse i është drejtuar fillimisht Presidentit Nishani, letrës së Tahirit iu përgjigj Ministri i Drejtësisë Ylli Manjani.
Përmes një reagimi për mediat, Manjani ka urdhëruar ka urdhëruar verifikimin e veprimtarisë gjyqësore të gjyqtarit të Gjykatës së rrethit Vlorë, Laurent Fuçia.
Madje sipas Ministrisë së Drejtësisë problemi nuk qëndron vetëm tek Fuçia, por tek e gjithë Gjykata e Vlorës.
“Ministria e Drejtësisë administron dhe vetë të dhëna të marra nga shumë agjenci ligjzbatuese si dhe nga vetë qytetarë të Vlorës mbi sjellje jo profesionale në Gjykatën e Vlorës.” – shprehet Manjani.
Ja njoftimi i Policisë së Vlorës për pretendimin e Tahirit
Policia e Vlorës ka arrestuar 3 persona për armëmbajtje pa leje në lokalin e basteve sportive. Në prangat e policisë u vunë Vasil Papa 32 vjeç, Ergyst Murati 7 vjeç dhe Klajdi Begaj 26 vjeç.
Në cilësinë e provës material këtyre personave iu sekuestruan 2 armë zjarri pistoletë të llojit “TT” model 54, 1 armë zjarri pistoletë të llojit “Beretta”,21 fishekë të kalibrit 6.72 mm,15 fishekë të kalibrit 9 mm,4 krëhëra të mbushura me fishekët e mësipërm, 6 aparatë celularë.
“Gjatë një kontrolli të ushtruar në lokalin e basteve sportive të quajtur “Eccobet” në lagjen “Pavarësia” (në pronësi të shtetasit, K.Ll), Strukturat e Policisë, kanë konstatuar se shtetasi: Vasil Papa, dispononte një armë zjarri (në brez) pistoletë të llojit “TT” model 54, 2 krëhëra me nga (7+6) fishekë plus 1 fishek tjetër i cili ndodhej në folenë e fishekut, duke paraqitur një rrezikshmëri të lartë për qytetarët. Gjithashtu, pranë një tavoline në të cilin po qëndronin shtetasit: Klajdi Begaj dhe Ergyst Murati, u gjetën 2 armë zjarri të tjera (TT dhe Beretta), si dhe 2 krëhëra me 7 dhe 15 fishekë, të cilat ishin të fshehura në pjesën e dyshemesë”, thuhet në njoftimin e policisë.
Materialet i kaluan Prokurorisë në ngarkim të këtyre shtetasve për veprën penale “Prodhimi dhe mbajtja pa leje e armëve luftarake dhe municioneve”.
Ja letra e Tahirit:
