Parlamenti ka votuar me 106 vota pro që mandati i deputetit socialist Koço Kokëdhima të shkojë në Kushtetuese për shqyrtim pas kërkesës së opozitës se deputeti ka përfituar fonde publike për kompaninë e tij, duke rënë ndesh me Kushtetutën.
Para votimit nga parlamenti, Kokëdhima ka folur gjatë dhe nga foltorja ka akuzuar ish-kryeministrin Sali Berisha dhe deputetët e opozitës se shpifin ndaj tij.
“Në qarqet Vlorë e Gjirokastër dhe aty ku punoj unë e keni parë si keni dalë. Në Vlorë nga 2 deputetë njërin nuk do e kesh, në Vlorë do shkojmë me 7. Do plakesh e do mpakesh ti Sali. Do dalësh gjysmak! Ti nuk më komplekson dot mua dhe nuk komplekson dot askënd dhe je modeli më i zi i politikës së Shqipërisë. Në qafën tënde varen akuza nga më të mëdhatë, deri vrasje, vjedhje”, tha Kokëdhima.
Deputeti socialist tha se kontratat e kompanisë së tij Abissnet për të cilat e akuzon opozita janë bërë para se ai të bëhej deputet.
“Isha administrator i Abissnet deri më 31 korrik 2013. Po këtë nuk e thoni ju. Unë jam bërë deputet më 2 gusht 2013. Padyshim që kështu është e vërteta. Asnjë kontratë nuk ka bërë kompania pasi unë jam shpallur deputet i këtij parlamenti. I keni dëgjuar që thonë se Koço ka përfituar fonde. Këtyre nuk u intereson e vërteta, u duhen vetëm sebepe dhe alibia për të përbaltur kundërshtarët”, tha Kokëdhima.
Ai nuk i ka kursyer ofendimet ndaj deputetëve të opozitës dhe Berishës.
“Të punosh për ju është vjedhje. Të bësh pasuri me djersën e ballit është vjedhje. Ju jeni kusarë dhe keni vjedhur. Ai i pari dhe çeta nga mbrapa. Unë kam bërë biznes të ligjshëm në qeverisjen tuaj. Më keni pasur opozitarë gjithë kohës se kam bërë shtyp. Kjo pasuri është fituar para se të isha deputet dhe ka vazhduar. Kontrata ka vlerën e ligjit. Nuk mund të prishë deputeti kontrata”, vijoi ai.
Kokëdhima deklaroi se nuk ka bërë asnjë shkelje të ligjit duke i quajtur shpifje të ish-kryeministrit Berisha akuzat ndaj tij. “Vetëm unë e kam në dorë fatin tim. Nuk jam unë i pavetëdijshëm. Jam i vetëdijshëm se nuk kam bërë asnjëherë shkelje ligji. Shpif këtu çdo ditë si arixhofkë. Përgjigjja ime nuk është këtu me llafe por atje me punë. Nuk shpif unë, këtu, nuk bëhem si ti”, deklaroi Kokëdhima.
(Boldnews)
