Në një kohë kur brenda socialistëve shfaqen kritika për mënyrën e qeverisjes, kryeministri Edi Rama me një lëvizje të beftë merr dy vendime për të “qetësuar” zërat kundër. Sëpari ka të bëjë me aktin normativ ku i është dhënë zgjidhje pensionit për 5425 ish-ushtarakë, të cilët aktualisht janë debitorë pranë Institutit të Sigurimeve për pensionet që kanë marrë më herët.
Sipas vendimit të sotëm të qeverisë, është vendosur që të falet shuma prej 984 milionë lekë borxhe.
Vendimi u bë publik nga ministri i Çështjeve Sociale Blendi Klosi, i cili theksoi se falë vendimi asnjë ish-ushtaraku nuk do i mbahet më asnjë qindarkë nga pensioni i çdo muaji. Një vendim i qeverisë së shkuar i detyronte të kthenin mbrapsht një pjesë të pensionit që kishin marrë më herët, për shkak të rishikimit të shumës së pensionit mujor.
Ende është e paqartë nëse qeveria do të rikthejë detyrimet që u janë mbajtur për vite me radhë ish-ushtarakëve.
Ndërkohë vendimi tjetër i qeverisë ishte dyfishimi i ndihmës ekonomike.
“Konkretisht, kemi marrë vendimin për të rritur me 60% pagesën bazë të papunësisë, e cila nga 6850 lekë në muaj, bëhet sot 11 mijë lekë në muaj apo 110 mijë lekë të vjetra. Ky është një vendim tejet i rëndësishëm, jo vetëm për shkak të shifrës 60%, por edhe pasi kjo rritje ndodh për herë të parë pas shumë vitesh që kjo pagesë ka qenë e niveleve të ulëta.” – deklaroi Ministri i Mirëqënies Sociale Blendi Klosi gjatë prezantimit të dy vendimeve.
