Merr fund makthi për shoferët që qëndrojnë në radhë për të pritur lejen e drejtimit të bllokuar ose për të ankimuar gjobën. Kjo pasi, komisioni i policisë rrugore pritet të shkrihet ndërsa një grup pune i përbërë nga uniformat blu dhe Ministria e Transporteve do të nisin punën për ndryshimet e nevojshme në kodin rrugor.
Mbyllja e kësaj strukture të shumëpërfolur edhe për abuzime, do të shmangë sorollatjen e dhjetra qytetarëve në dyert e Komisariatit të Policisë Rrugore. Sipas ekspertëve, vendimet e komisionit shpesh herë ishin në konflikt interesi pasi, anëtarët e komisionit janë efektivë policie dhe në shumicën e rasteve mbanin qëndrimin e kolegut që kishte vendosur gjobën.
Tashmë me ndryshimet e reja, pritet që qytetarët t’i drejtohen vetëm Gjykatës Administrative.
Shkrirja e komisionit të njohur si organi administrativ shtetëror, pritet t’i japë një rol kyç efektivëve të policisë rrugore në terren për të rritur masën e gjobës. Me kodin aktual ata nuk mund të vendosin gjobë në vlerën më shumë se 5 mijë lek të reja ndërsa masa e pezullimit të patentës është atribut i Komisionit.
