Skëndër Bruçaj, Kryetari i Komunitetit Mysliman shqiptar, është vënë në dispozicion të drejtësisë për të dëshmuar lidhur me 9 imamët e vetëshpallur të cilët akuzohen për rekrutim të personave me qëllim për t’i dërguar në luftime dhe akte terroriste në Siri.
Në bankën e Gjykatës së Krimeve të Rënda, Bruçaj deklaroi se e kishte informuar Prokurorinë e Krimeve të Rënda me një listë me 10 xhami në të gjithë vendin të cilat ishin jashtë juridiksionit të Komunitetit Mysliman dhe se imamët që predikonin në to nuk ishin emëruar nga Komuniteti, duke krijuar dyshime mbi frymën e predikimit tek besimtarët.
Pikërisht në dy prej këtyre xhamive, në Tiranë vepronin dhe predikonin 9 të pandehurit e këtij procesi, përpara arrestimit.
Gjatë dëshmisë së tij u regjistruan edhe incidente në sallën e gjyqit. Kreu i Komunitetit Mysliman është ndërprerë disa herë nga të pandehurit, të cilët nuk kanë kursyer as etiketime, si spiun i dërguar nga Ambasada e Shteteve të Bashkuara të Amerikës.
Madje gjatë këtyre replikave, trupi gjykues është detyruar të nxjerrë nga salla dy nga të afërmit e të akuzuarve, që flisnin nga publiku, ndërsa i pandehuri Gerti Pashja, e ka pyetur kreun e Komunitetit Mysliman, nëse quhet ekstremizëm të predikosh me një libër të vetë Komunitetit Mysliman dhe përgjigjia e Bruçajt ka qenë, jo nëse predikon në bazë të atij libri.
Dëshmia e Bruçajt nuk solli asgjë të re për çështjen dhe prezenca e tij në Gjykatën e Krimeve të Rënda duket se u shfrytëzua nga të pandehurit vetëm për të lëshuar sulme personale ndaj kreut të komunitetit mysliman.
