Grupi parlamentar i Partisë Socialiste është mbledhur sot për të diskutuar letrën e dy deputeteve Dade dhe Hafizi për incidentin e ndodhur në Elbasan me deputetin Ben Blushi. Ato kërkonin që PS të analizojë atë çfarë ndodhi, por duket se pikërisht kjo temë ka sjellë ngritjen e zërave dhe acarimin e mbledhjes së PS-së.
Deputeti Blushi foli menjëherë pas mbarimit të mbledhjes duke akuzuar direkt PS dhe duke bërë përgjegjës kryeministrin Edi Rama se po nxit dhunën.
Ai kërkoi që PS të distancohet nga incidenti në Elbasan.
“Unë do të doja që PS të distancohej sepse ky nuk është problemi im, por i vijës politike të një partie të madhe që ka qeverinë e që tenton të edukojë. Ky është një problem i madh pedagogjik. Ka një pedagogji politike e në këtë rast nuk po funksionon. Njerëzit po nxiten të veprojnë me dhunë ndaj mendimeve ndryshe. Duhet të pyesni zotin Rama se çfarë mendon për incidentin e Elbasanit dhe sa përgjegjës është për gjuhën”, deklaroi Blushi.
Në lidhje me dekriminalizimin dhe nëse ka deputetë kriminelë në parlament, sërish Blushi ka kërkuar që të pyetet Rama. Por siç tha ai nëse nuk do të kishte deputetë kriminelë përse Rama do ta votonte ligjin?!
“Nëse PS ka votuar një ligj për dekriminalizimin, nëse nuk ka patur kriminelë përse e ka votuar? Nëse Edi Rama mendon se nuk ka patur kriminelë në parlament përse e ka votuar? Kjo nuk është pyetje për mua”, theksoi ai.
Deputeti i majtë nuk ka dhënë detaje për mbledhjen e PS-së në Elbasan ku pati incidente por theksoi se PS duhet të distancohet nga kjo tendencë pasi mund të përsëritet.
“Nuk është në stilin tim të tregoj se çfarë ndodh në një mbledhje me dyer të mbyllura. Në Elbasan pati dhunë, shenja kundërshtie me dhunë dhe PS duhet të distancohet nga kjo tendencë. Nëse rregulli nuk zbatohet, kjo situata mund të përsëriten”, u shpreh deputeti socialist.
Por ndryshe ka folur deputeti Taulant Balla. Duke iu përgjigjur akuzave të Blushit, Balla tha se ishte deputeti i ‘fishkëllyer’ ai që filloi i pari dhe acaroi situatën. Madje Balla tha se Blushi i është larguar interesit të sallave duke menduar për karrigen e radhës. Nënkryetari i grupit socialist tha se Blushi foli pa plan dhe se e nisi fjalimin me fyerje ndaj ndodhi ajo që ndodhi.
I pyetur për fatin politik të Blushit, nëse do të përjashtohet nga grupi i PS, Balla tha se ‘çdo kush e ka në dorë vetë fatin e tij”.
(Boldnews)
