Një nga pikat kryesore të konsesusit mes palëve politike për dekriminalizimin, ishte edhe formulari final i vetëdeklarimit. Boldnews.al e disponon këtë formular që do të plotësohet nga të gjithë punonjësit e administratës shtetërore, duke nisur nga Presidenti e deri tek specialisti më i thjeshtë. (Kliko këtu që të shkarkosh formularin)
I konsideruar si një nga aktet kyçe nënligjore për dekriminalizimin, ky formular i vetëdeklarimit ka rekomandimet dhe sugjerimet e të dy partive më të mëdha në vend, PS dhe PD.
Formulari është i ndarë në tre kapituj, ku secilit i është dhënë rëndësi me penalitetet e përmendura në rast të deklarimit të rremë. Kjo nis që me identitetet e përdorura zyrtarisht dhe jozyrtarisht, për mosdeklarimin e të cilave, personi mund të ndiqet penalisht, në rast se bëhet pengesë për zbatimin e ligjit.
Formulari përmban 8 pyetje për gjendjen gjyqësore të personit me funksion publik. Ai përfshin pyetje rreth ndalimit ose arrestimit brenda dhe jashtë Shqipërisë, detaje për vendin, kohën dhe arsyen e ndalimit.
E njëjta procedure e detajuar ndiqet edhe nëse plotësuesi i formularit është ndjekur penalisht, ka patur vendim të formës së prerë brenda dhe jashtë vendit, apo ka patur urdhër ndalimi ndërkombëtar.
Personi që firmos formularin, që sugjerohet të jetë veprimi i fundit përpara dorëzimit, bie dakord për publikimin e të gjitha të dhënave si dhe, për verifikimin e shenjave të gishtërinjve dhe çdo të dhëne biometrike.
Nëse ai që firmos formularin jep të dhëna, që më vonë verifikohen si të pavërteta, të paplota ose të pasakta jo vetëm i ndërpritet mandati, i ndalohet më vonë e drejta për t’u zgjedhur, ose emëruar, por ndiqet penalisht dhe rrezikon të dënohet nga gjobë deri në burgim.
