Ashtu siç kishte paralajmëruar pak ditë më parë, dhjetra gra, nëna dhe vajza protestuan para kryeministrisë për të kundërshtuar, sipas tyre dhunën verbale të ushtruar në parlament.
Nismëtare e kësaj proteste ishte Lidhja Demokrate e Gruas, ndërsa fjalën e hapjes e morrën dy deptutete e përjashtuara për disa ditë nga jeta parlamentare, Albina Deda dhe Arbjola Halimi.
Sipas tyre, kryeministri Edi Rama i ka ofenduar gjatë seancës parlamentare të së enjtes.
“Sot gratë janë në mjerim, të kërcënuara në të gjitha të drejtat e tyre. Me dhjetëra nëna janë burgosur dhe për shkak të faturave që nuk përballojnë dot. Ato jetojnë lënduara dhe sot si kurrë më parë atyre u është vrarë shpresa.”-u shprehën ndër të tjera deputetet demokrate.
Ndërkohë kryetarja e LDGSH Albana Vokshi tha se bota e grave nuk mund të jetë kurrë bota e Ramës, arrogante me komplekset, inatin, zemërimin, urrejtjen ndaj çdokujt.
Por çfarë tha në parlament kryeministri Rama ?
Të shtunën gjatë një takimi me Forumin e Grave Socialiste, kreu i qeverisë Edi Rama sqaroi incidentin e ndodhur në parlament ku deputetet Albina Deda dhe Arbjola Halimi qëlluan me letra dhe vezë për shkak të pretendimeve se ishin ofenduar nga kryeministri.
Por, kryeministri Rama u shpreh se fjalët e tij janë keqkuptuar dhe se për asnjë moment nuk ka lëshur ofendime apo provokuar deputetet.
“Të marrësh leksion nga burra që i abuzojnë gratë për t’i bërë viktima, siç abuzuan me atë të shkretën që unë i thashë “motër”, ata thonë i tha “mostër” se duan ta përdorin viktimën për të luftuar me mua dhe me ne.”– u shpreh kryeministri Rama në takimin e 27 shkurtit.
