Nga Boldnews.al
Personeli turk që punon te Spitali Memorial i Fierit, i bashkë financuar nga Qeveria shqiptare dhe ajo turke, do të akomodohet në një hotel me kushte të forta sigurie.
Sipas dokumenteve që disponon Boldnews.al, turqit kanë kërkuar masa shtesë sigurie, madje edhe izolim të vendit që do të qëndrojnë. Por, ky izolim i ka kushtuar këtij spitali plot 150 milionë lekë të vjetra, duke lënë të kuptohet se mes shqiptarëve dhe turqve në këtë spital ka diferenca të mëdha në trajtim.
Madje, pagat apo shpërblimet janë të ndryshme, pasi turqit kanë marrë garanci të mëdha page dhe akomodimi, por edhe sigurie!
Në dokumentet e siguruara nga redaksia jonë, të cilat i referohen procedurës tenderuese për akomodimin e këtij personeli, kanë dalë të dhënat edhe për sigurinë. Madje, oferta më e ulët, prej plot 150 milionë lekësh, u skualifikua me arsyetimin se “nuk ofronte siguri”. Mjekët po kërkojnë kushte sigurie sikur të ishin agjentë dhe jo mjekë, të cilat duhet të jenë më human apo më pranë pacientëve. Por, ata po izolohen, sikur Shqipëria të ishte një vend i botës së tretë!
Sipas dokumenteve, Spitali Memorial i Fierit ka analizuar tenderin me objekt “shërbim i akomodimit të personelit turk”, me fondin limit 32.247.180 lekë pa TVSH.
Në këtë procedurë ka marrë pjesë firma “ERAL” me ofertë 17.483.800 lekë pa TVSH dhe firma “HAXHI SHAHU” me ofertë 32.239.200 lekë pa TVSH. Oferta e dytë është rreth 50 përqind më shumë se vlera e ofertës së parë.
Në dokumentet e këtij spitali shkruhet se është skualifikuar oferta e firmës “ERAL SHPK” pasi nuk plotëson licencën përkatëse ku përcaktohet kategoria dhe niveli i strukturës akomoduese. Gjithashtu, në pikën dy, ky subjekt është skualifikuar me arsyetimin se “operatori ekonomik pjesëmarrës për arsye sigurie duhet të marri përsipër mbylljen e aktivitetit brenda rrethimit dhe nuk duhet të lejojë klientë të tretë brenda ambienteve të tij, përveç personelit të hotelit gjatë gjithë periudhës së ekzekutimit të kontratës”.
Pra, personeli turk kërkon një ambient të veçantë qendrimi, ku mos të ketë persona të tjerë. Madje, të izoluar nga çdokush, kërkesa të cilat ngjasojnë më shumë nga ato të shërbimeve sekrete sesa të mjekëve apo të infermierëve të këtij spitali.
Por, diferenca mes ofertës më të ulët dhe asaj më të lartë është plot 150 milionë lekë, një shumë e konsiderueshme që shpenzohet nga taksat e shqiptarëve. Por, me këto para’, apo edhe investime të tjera në atë spital, duket se shqiptarët po e ndërtojnë vetë atë godinë, dhe jo siç u propagandua më të madhe se është donacion i qeverisë turke. Përveç parave, firma e cila ndërtoi godinën, ka fituar tenderë në Shqipëri, ku duket se ndërtimi i spitalit ka qenë “bakshishi” për dhjetëra miliona euro që ka përvetësuar. Goxha investim!
