Nga Boldnews.al
Komisionerja e Vetingut, Etleda Çiftja, e marrë e pandehur nga Prokuroria e Posaçme për probleme me pasurinë, po braktiset përditë nga kolegët e saj, ndërkohë që ajo vijon të qëndrojë në detyrë.
“Boldnews.al” raportoi më herët se Çiftja u përjashtua nga procesi i rivlerësimit të gjyqtarit të Shkodrës, Andri Ymeri, pasi ky i fundit vlerësoi se komisionerja ishte në papajtueshmëri me funksionin, për shkak se është marrë e pandehur për vepra penale që lidhen me pasurinë.
Një kërkesë të ngjashme dorëzoi edhe gjyqtari i Tiranës, Altin Abdiu.
Në 14 qershor 2022, gjyqtari Abdiu u paraqit në seancë dëgjimore para trupës së Komisionit të Pavarur të Kualifikimit (KPK), të përbërë nga Roland Ilia kryesues, relatore Pamela Qirko dhe anëtare Etleda Çiftja.
Seanca u ndërpre, pasi subjekti kërkoi përjashtimin e komisioneres Çiftja. Kërkesa e gjyqtarit u pranua nga një panel tjetër, i shortuar për këtë rast, i përbërë nga komisionerët Genta Bungo (Tafa), Olsi Komici dhe Brunilda Bekteshi.
Në njoftimin për seancën e radhës për gjyqtarin Abdiu, e cila pritet të zhvillohet në 24 Qershor, KPK ka zëvendësuar Etleda Çiftjan me komisioneren Suela Zhegu.
“Të përjashtohet Etleda Çiftja”
Gjyqtari Altin Abdiu kërkoi, nëpërmjet avokates së tij, Antoneta Sevdari, përjashtimin e komisioneres Etleda Çiftja, pasi ajo nuk mund të ushtrojë kontrollin e pasurisë së subjektit, kur vetë është marrë në cilësinë e të pandehurës nga Struktura e Posaçme Anti-Korrupsion (SPAK) për probleme me pasurinë e saj.
“Komisionerja (Etleda Çiftja) nuk mund të vazhdojë të ushtrojë detyrën, pasi është nën hetim, dhe nuk mund të garantohet pavarësia dhe paanësia e Saj”, thuhet në kërkesën e gjyqtarit Abdiu.
Më tej, gjyqtari vijon: “Fakti që znj. Çiftja është marrë e pandehur për shkak të deklarimit të rremë të pasurisë, vlerësoj se përbën të dhënë të mjaftueshme për ta konsideruar “Sjelljes së papërshtatshme në përmbushjen e detyrimeve, në marrëdhëniet dhe në komunikimin me institucionet shtetërore dhe funksionarët e tyre, si dhe raste të tjera me sjellje të papërshtatshme të pajustifikuar”.
Pas dorëzimit të kërkesës së gjyqtarit, një panel i shortuar për këtë rast, vendosi pranimin e kërkesës dhe përjashtimin e komisioneres Etleda Çiftja nga procesi i rivlerësimit të gjyqtarit Altin Abdiu.
“Boldnews.al” nuk ka siguruar ende argumentat e përdorur në vendimin e përjashtimit të Komisioneres.
Megjithatë, në një situatë tërësisht të ngjashme, bazuar në kërkesën e mëparshme të gjyqtarit të Shkodrës, Andri Ymeri, KPK konstatonte se “në kushtet kur komisionerja është marrë si e pandehur nga një organ i drejtësisë së re, mund të perceptohet nga publiku si e papërshtatshme për të kryer procesin e rivlerësimit të gjyqtarëve dhe prokurorëve”.
Anëtarja e Komisionit të Pavarur të Kualifikimit, Etleda Çiftja, është marrë e pandehur në 24 Maj 2022 nga Struktura e Posaçme Anti-Korrupsion (SPAK), për akuzat e “falsifikimit të dokumentave” dhe “deklarimit të rremë të pasurisë”.
Prej më shumë se një muaji, asnjë nga institucionet përgjegjëse, përfshirë KPK-në, Kolegji e Posaçëm të Apelimit apo Operacioni Ndërkombëtar i Monitorimit, nuk kanë ndërmarrë masat për pezullimin e saj nga detyra.
