“Shqipëria në rrezik” ishte aktiviteti që u organizua pasditen e sotme, me pjesëmarrjen e kreut demokrat, Sali Berisha.
Altin Goxhaj, një prej organizatorëve të takimit, tha se sot pyetja që shtrohet është çfarë duhet të bëjmë ne për të shpëtuar Shqipërinë?
“Jemi në diktaturë absolute, jemi në monizëm dhe diskutohet sot në 2022 të kthehemi në hallet e fundviteve 1980, kur problem ishte uria”, tha Goxhaj.
Ai tha se sot janë mbledhur ajo pjesë e shoqërisë e cila është e pakapur qoftë nga regjimi i Ramës ashtu edhe nga Soros.
Duke marrë fjalën në takim, Berisha i shprehu mirënjohjen për kontributin e dhënë duke u përballur me një guxim të veçantë dhe ekspertizë të lartë me një regjim, i cili siç fakton çdo ditë nuk përfill në këtë vend, asgjë, përveç interesave të ngushta të qeveritarëve dhe Edi Ramës.
“Në këtë vend, zëri i komuniteteve, i grupeve të interesit, i opozitës, shumëzohet me zero dhe është zëvendësuar në variantin më tragjiko-komik me fletushkat që plotësohen në zyrat e PS si opinione të qytetarëve”, tha Berisha.
Sipas tij, kjo është një formë e shëmtuar e tiranëve absolutë, të cilët zgjedhjet e lira i zëvendësojnë me takimet mexhelis.
“Edi Rama sillet në disa aspekte individuale, si asnjë zyrtar i lartë tjetër në historinë e Shqipërisë. Edi Rama me vendimet që merr dëshmoi se shpërfill çdo interes qytetar, të grupeve të interesit apo kombëtar. Imagjinoni ju, për projektin, më të madh kombëtar të shqiptarëve, projekti i Shqipërisë në familjen e kombeve të zhvilluara europiane, Rama me një kurajo të jashtëzakonshme e nxjerr në treg këtë projekt dhe pa marrë mendimin e askujt e zëvendëson me projektin e Ballkanit të hapur, projekt nën influencat ruse dhe serbe”, tha Berisha.
