Lajmi që stilisti Valdrin Sahiti është i pajisur me pasaportë diplomatike bëri xhiron e mediave pak kohë më parë. Pasaporta diplomatike është një dokument i rëndësishëm, me të cilin mund të pajisen vetën zyrtarët më të lartë të një shteti. Duke nisur nga presidenti, kryeministri, ambasadorë e të tjerë dhe familjarë të tyre.
Thuhej se këtë dokument ia kishte lëshuar presidentja e Kosovës, Vjosa Osmani, me të cilën stilisti ka një marrëdhënie të afërt. Mirëpo, këto pretendime u hodhën poshtë nga këshilltari për media i Osmanit, i cili deklaroi se presidentja nuk ka një kompetencë të tillë.
Së fundmi, avokati Durim Berisha, me anë të një postimi në faqen e tij zyrtare në Facebook, ka treguar se ka paraqitur një kërkesë pranë zyrës së Kryeprokurorit të Kosovës, për të hetuar nga e ka marrë stilisti këtë pasaportë. Ndër të tjera ai shprehet se i mbetet institucioneve të drejtësisë të vlerësojnë nëse shitja e fustaneve konsiderohet interes i jashtëzakonshëm shtetëror.
Menjëherë pas kërkesës së avokatit ka reaguar, zyra e Kryeprokurorit, e cila ka deklaruar se kjo kërkesë është transferuar pranë Kryeprokurorit të Prokurorisë Themelore në Prishtinë.
