Deputeti i Partisë Socialiste, Erion Braçe, është paraqitur mëngjesin e kësaj të mërkure në ambjentet e GJKKO, për procesin gjyqesor me biznesmenin Anduel Çekrezi, në lidhje me padinë për “shpifje”.
Palët nuk ranë dakord për pajtim në seancën e fundit duke vijuar seancat gjyqësore për padinë e shpifjes e cila lidhet me një konflikt të hershëm pronësie në zonën e Imshtës, në Lushnje.
Konflikti lidhet me pretendimet për zaptimin e tokave të banorëve për ndërtimin e një parku fotovoltaik, ndërsa palët kanë pasur përplasje të vazhdueshme, përfshirë edhe në rrjetet sociale.
Biznesmeni Çekrezi pretendon se disponon dokumentacion të rregullt pronësie dhe se toka në fjalë është blerë ligjërisht.
Ndërkohë nga ana tjetër, deputeti Braçe këmbëngul se bëhet fjalë për tokë publike, madje duke pretenduar se është privatizuar edhe një pjesë e lumit.
