Finlanda nuk ka gjasa të anëtarësohet në NATO para shtatorit. Kështu është shprehur presidenti i vendit skandinav Sauli Niinisto, ndërkohë që ngërçi me Turqinë nuk po gjen zgjidhje.
Presidenti finlandez u takua të martën me presidenten e Parlamentit Evropian Roberta Metzola, duke u fokusuar në luftën në Ukrainë dhe efektet e saj në ekonomi dhe energji.
Duke folur për gazetarët, Niinisto iu referua edhe takimit që u zhvillua dje mes delegacioneve të vendeve nordike dhe Turqisë në selinë e NATO-s. “Në fakt nuk ka pasur shumë përparim, por jemi të lumtur që takimi më në fund u zhvillua. Ramë dakord që të vazhdojmë bisedimet”, tha ai.
I pyetur nëse Finlanda mund t’i bashkohet aleancës deri në shtator, Niinisto tha: “Nuk dua të jap një datë të saktë, por nuk ka gjasa që të ndodhë para shtatorit”.
