Ish-Kryeministri Sali Berisha bëri një akuzë të fortë ndaj ministres së Shëndetësisë, Ogerta Manastirliu, jo vetëm për tenderat sekretë në kohën e pandemisë, por edhe për mashtrimin që i bëri shqiptarëve duke i thënë se janë siguruar 50 respiratorë, ndërkohë që nuk ishin kaq.
Berisha tha se askush nuk mbajti përgjegjësi për këtë mashtrim, ku nga 50 erdhën 5 respiratorë, pasi Gjelishti ishte mik i ministres, një ish-punonjëse bashkie e Edi Ramës, që ai e gradoi ministre të Shëndetësisë.
Gjithashtu Berisha përmendi edhe Vilma Nushin si oligarken e sistemit shëndetësor shqiptar, që ka përfituar miliona euro nga buxheti i shtetit përmes koncensioneve.
“Opozita do të përmbushë misionin e saj vetëm kur qytetarët, mjekët, mësuesit, të ngrihen për të zgjidhur këtë problem, largimin e Qeverisë, dhe më pas do të bëjmë reformat më të shkëlqyera që ringrenë sistemin e shëndetësisë. Nuk ka zhvillim të shoqërisë pa një sistem shëndetësor të konsoliduar dhe avancuar, por këto nuk vijnë nëse ne nuk ngrihemi, nëse nuk kthejmë spitalet tona në qendra të fuqishme të një lëvizjeje që i shkurton ditët këtij regjimi”, tha Berisha.
Ai tha se Qeveria e ka mendjen te vjedhjet, vjedh mjekët e pacientët, vjedh te medikamentet, ndaj ju përçmojnë dhe ju nëpërkëmbim. “Duhet ndryshuar ky sistem monist, mjekët janë mjekët me influencë, duhet të përdorin të gjithë influencën që keni, përndryshe dëshpërimi do e rrënojë shoqërinë shqiptare”, tha ai.
