Pandeli Majko, një prej figurave qendrore në Partinë Socialiste për të paktën dy dekada, ka zgjedhur të urojë 31 vjetorin e themelimit të PS-së me një foto të Fatos Nanos dhe Dritëro Agollit.
I lënë në hije së fundmi nga Edi Rama, duket se Majko ka zgjedhur të kujtojë kohën e dy prej figurave kryesore të transformimit të Partisë së Punës së Shqipërisë në Parti Socialiste në 12 qershor të 1991.
Ish-Kryeministri, Pandeli Majko, sot deputet i PS-së, në rrjetet sociale shkruan: “shumica e jetës së njeriut, është veprimtari plotësuese. Ka çaste, kur rastësia kthehet në dicka të përsosur, siç ishte 12 qershori i 31 viteve më parë. Gëzuar ditëlindjen Familja ime, Partia Socialiste”.
Duket se Majko ka zgjedhur të mos përmendë Edi Ramën, i cili drejton selinë e PS prej 17 vitesh dhe nga momenti që morri në dorë frenat e partisë, largoi shumë nga ata që konsideroheshin socialistë e progresistë.
