Një i ri humbi jetën këtë të Shtunë në Tiranë në një atentat me lëndë plasëse. Viktima është 27-vjeçari Aleksandër Sadikaj.
Sipas një rindërtimi paraprak të ngjarjes nga policia, ora shënonte 13:35, kur në afërsi në afërsi të TEG-ut, një automjet tip “Volkswagen” shpërtheu në flakë.
Drejtuesi i makinës, si pasojë e shpërthimit mbeti i plagosur rëndë. Ai u transportua për në spital, por nuk mundi të mbijetojë.
Nga pamjet e sjella nga vendngjarja shquhet automjeti i të riut që është shkatërruar plotësisht.
Dyshimet e para janë se shpërthimi në makinën tip “Volkswagen” ka qenë i telekomanduar dhe lënda plasëse ishte vendosur në pjesënn e parme të mjetit.
“Në vendngjarje ndodhen shërbimet e Policisë, ekipi anti-eksploziv i RENEA-s dhe Grupi hetimor vijon punën për zbardhjen e plotë të rrethanave të ngjarjes, identifikimin dhe kapjen e autorëve”, thuhet në njoftimin paraprak të policisë për ngjarjen.
Burime policore bëjnë me dije se 27-vjecari Sadikaj është proceduar më parë për tentativë vrasje, por nuk rezulton i dënuar.
Referuar raportimeve mediatike, por jo të konfirmuara zyrtarisht nga autoritetet, i riu ishte nga fshati Mbolan i Dimanlit, por jetonte me të ëmën në kryeqytet.
