Stenio Juniorit i ka përfunduar kontrata me Partizanin dhe pritet të firmosë me një tjetër klub në sezonin e ri, teksa shanset më të mëdha janë që ai të transferohet në një nga kampionatet e vendeve aziatike. Gjithsesi, te Partizani do të shpresojnë deri në momentin e fundit për ta mbajtur brazilianin.
Trajneri Dritan Mehmeti e vlerëson shumë Juniorin dhe e konsideron një lojtar shumë të rëndësishëm për lojën e Partizanit. Këtë e ka treguar qartë në deklaratat e tij sa herë është pyetur për 30-vjeçarin. Madje, trajneri ka kërkuar që në nisje të aventurës së tij rinovimin me Juniorin, por sulmuesi ka qenë i vendosur për të vijuar karrierën në një ligë tjetër, ku fitimet të jenë më të mëdha dhe të sigurta. Trajneri i Partizanit, më në fund u ul me drejtuesit për të bërë planin e sezonit të ri dhe natyrshëm ka shprehur dëshirat e tij.
Një nga detajet e pakta që ka arritur të filtrojë nga mbledhja “top-sekrete” e së hënës, është edhe dëshira që trajneri i ka shprehur presidentit Demi. Ai ka kërkuar që klubi të këmbëngulë deri në fund për të mbajtur Juniorin, me presidentin Demi, që ia ka premtuar këtë. Gjithsesi, me limite. Junior e ka marrë vendimin dhe e vetmja mundësi për momentin është që ai të jetë me Partizanin vetëm në ndeshjet e Ligës së Konferencës, për t’u larguar më pas përfundimisht rreth fundit të korrikut.
Ajo që e bën të mundur këtë operacion, është fakti që Junior pritet të jetë pushim deri në muajin gusht. Aktualisht, braziliani ndodhet në Fortaleza, në Brazil, ku po shijon disa ditë pushimi me familjen.
