Një person i kërkuar si pjesë e një hetimi të Agjencisë Kombëtare të Krimit në Britani është vetëdorëzuar. Jeton Memia, 29 vjeç, më herët ka qenë objekt i një apeli mediatik për ndihmë në gjurmimin e tij.
Katër burra të tjerë u arrestuan në kuadër të hetimeve për një grup kriminal të dyshuar për përdorimin e emigrantëve shqiptarë për të kultivuar kanabis.
Memia u dorëzua për një intervistë vullnetare dhe u mor në pyetje nën dyshimin për komplot për prodhimin dhe furnizimin me drogë të kontrolluara dhe pastrim parash. Ai u lirua në pritje të intervistës së mëtejshme.
Në një seri arrestimesh dy javë më parë në Uellsin e Veriut dhe Cheshire, katër burra të tjerë u arrestuan nën dyshimin për vepra penale të kultivimit të drogës dhe pastrimit të parave.
Një burrë rreth të 50-tave u lirua me kusht, ndërsa dy burra rreth të 60-tave u liruan nën hetim. Një 28-vjeçar shqiptar është dorëzuar pranë autoriteteve të emigracionit.
