Kreu i Parandalimit të Pastrimit të Parave, Alket Hyseni është dorëhequr nga posti që mbante prej largimit të Gent Gazhelit, si ambasador në Turqi. Motivi i kësaj dorëheqje ka lidhje me zbatimin e vetting-ut.
Mësohet se Hyseni i ka dorëzuar dorëheqjen e tij kryeministrit Edi Rama dhe ministrit të Financave, Arben Ahmetajt.
Hyseni u emërua drejtor i Parandalimit të Pastrimit të Parave në Qershor 2016 dhe zëvendësoi Gent Gazhelin që u emërua ambasador në Turqi.
DPPP, lufton pastrimin e parave dhe financimin e terrorizmit. Drejtoria e Pastrimit të parave që drejtohej nga Alket Hyseni, e varur nga ministri i Financave, ka një rol kryesor në hetimin e pasurisë së gjyqtarëve dhe prokurorëve.
Më parë Hyseni ka qenë kryetar i Task Forcës së Kryeministrit për Pronat.
Letra e dorëheqjes: “Sic ju jeni në dijeni, Drejtoria e Përgjithshme e Parandalimit të Pastrimit të Parave do të luajë rolin e saj të ngarkuar nga ligji në hetimin e të gjithë gjyqtarëve dhe prokurorëve, që do të kalojnë në muajt në vazhdim në sitën e procesit të vetingut. Për shkak të këtij roli, emri im është sulmuar gjithmonë e më shpesh në javët e fundit, nga të gjithë ata që nuk kanë interes që reforma në drejtësi të gjejë një zbatim të shpejtë dhe efikas. Duke qenë i ndërgjegjshëm që reforma në drejtësi është një proces i pakthyeshëm, e duke qenë i bindur se është në interesin e të gjithë shoqërisë shqiptare që ky proces të zhvillohet sa më shpejt, ndiej se largimi im nga funksioni që kryej do të shërbejë për të eliminuar cdo alibi të të gjithë atyre që frikësohen nga reforma dhe pikësëpari nga vetingu”.
Hyseni mban edhe detyrën e kreut të komisionit të Garancive Statutore në PS.
Pak ditë më parë ambasadori i SHBA-ve, Donald Lu zhvilloi një takim me qeverinë lidhur me pastrimin e parave.
Sakaq opozita e ka akuzuar Hysenin si njeriun e Edi Ramës, që ka pastruar paratë. Hyseni është përfolur si mik me kryeministrin Rama.
