Bajram Begaj, i cili u votua pasditen e djeshme nga Kuvendi i Shqipërisë me 78 vota pro në postin e Presidentit të vendit, e merr zyrtarisht detyrën me 24 korrik 2022.
Por cilat janë çështjet që Begaj pritet të trashëgojë nga Presidenti në detyrë, Ilir Meta?
Një nga çështjet më sensitive është ajo e negociatave për kufirin detar me Greqinë, për të cilën Presidenti Ilir Meta u ankua se nuk ishte informuar nga Qeveria apo Kryeministri Edi Rama.
Meta ka akuzuar Kryeministrin Edi Rama se ishte ai, i cili nuk ka bërë transparencë për bisedimet. Ndërsa nga Athina zyrtare është theksuar se pengesë për marrëveshjen e kufijve ka qenë pikërisht Meta.
Çështja do të duhet të zgjidhet në Gjykatën Ndërkombëtare, dhe firmën do ta vendosë president i ri.
Drejtësia është një tjetër fushë ku do të shihet roli i Begajt. Gjykata kushtetuese mbetet ende e paplotë, ashtu siç edhe emërimet në Këshillin e Emërimeve në Drejtësi, kur debatet mes mazhorancës dhe Kreut të Shtetit kanë qenë të ashpra.
Ndërkohë pasi mori mbështetjen e Kuvendit për postin presidencial, nga raportime të ndryshme mësohet se Begaj të parin takim që ka zhvilluar ishte ai me ish-Presidentin Alfred Moisiu. Larg syrit të mediave dhe zhurmës së Tiranës, Begaj raportohet se ka vizituar Moisiun në banesën ku ai po qëndron në Baldushk të Tiranës.
Gjithashtu raportohet se në ditët në vijim Begaj do të ketë disa takime edhe me ish-Presidentët Bamir Topi dhe Rexhep Meidani. Nuk dihet nëse nga këto takime, Begaj po merr këshilla nga ish-Presidentët e mëparshëm ose jo.
