Ish-gjenerali Bajram Begaj u zgjodh president i Shqipërisë me 78 vota pro, 4 kundër dhe 1 abstenim. Begaj do të nisë detyrën e kreut të shtetit, pas përfundimit të mandatit të presidentit aktual Ilir Meta më 24 korrik.
Menjëherë pas votimit shefi i qeverisë tha: “I kemi dhënë Shqipërisë një president normal, për një vend normal dhe funksionimin normal të Zyrës së Kreut të Shtetit. Ai është një figurë e pakontestueshme nga ana e integritetit, humanizmit dhe përkushtimit për vendin dhe njerëzit”, tha kryeministri Rama.
Presidenti aktual i Republikës së Shqipërisë, Ilir Meta, ka uruar edhe pasardhësin e tij, Bajram Begajn. Në një postim në llogarinë e tij në Facebook, Meta i dërgoi nga Turqia urimet Begajt, për kandidaturën e të cilit kishte deklaruar më herët se nuk do të bëhej pengesë.
Meta firmosi nga Stambolli, ku ndodhet në një vizitë zyrtare, dekretin për lirimin nga detyra e Shefit të Shtabit të Përgjithshëm të Forcave të Armatosura të Republikës së Shqipërisë, si dhe nxjerrjen në lirim nga shërbimi aktiv në Forcat e Armatosura, të gjeneralmajor Bajram Begaj, per te mos i bere pjese ne pengimin e votimit te tij kur dihet se kushtetuta e ndalon qe ushtaraket te mbajne poste te tjera shteterore.
Ndërsa Kryetari i PD, ish-kryeministri Sali Berisha deklaroi pas braktisjes së procesit të votimit bashkë me mbështetësit e tij, se “burime plotësisht të besueshme, nga media dhe politikanë, kanë denoncuar firmosjen nga presidenti i ri të dokumentave për plaçkitjen e bazave ushtarake detare.” Ai e quajti “shumë të rrezikshme për vendin” procedurën e zgjedhjes së Presidentit të ri”. “Kjo procedurë hap shtegun, krijon precedent, që çdo shef shtabi të aspirojë që të kapë kreun e shtetit. Në rastin konkret, flitet se Edi Rama është korruptuar me pronat e bazave ushtarake, dhe të ushtrisë. Me akuzat për pronat e bregdetit jam njohur edhe më herët por për këto fakte jam njohur dje dhe sot”, tha ish-kryeministri Berisha.
Enkelejd Alibeaj, i cili me disa deputetë të Partisë Demokratike bojkotuan seancën për zgjedhjen e presidentit të republikës, reagoi pas votimit të Bajram Begajt në Kuvend. Alibeaj ka argumentuar mungesën e deputetëve demokrat në sallë, duke thënë se i gjithë procesi ka qenë farsë
“Shqipëria kishte nevojë jo vetëm për një President të të gjithëve, por mbi të gjitha për një proces gjithëpërfshirës, transparent e real, i cili t’i jepte atij besimin e të gjithë shqiptarëve. Produkti i këtij procesi do mund të shihej kështu si bartës i unitetit të popullit, si njeriu mbi palët, si zbutës e moderator i klimës politike dhe si rregullator i ngërçeve insititucionale. Presidenti i Republikës forcën e vet e merr nga besimi dhe legjitimiteti që populli i jep. Ishte ky detyrimi që secila palë politike, e cila pretendon të përfaqësoje sinqerisht shqiptarët, duhej të angazhohej e të përmbushte kështu detyrimin e saj kushtetues, politik dhe institucional. Këtë besuam e besojmë, dhe kësaj i shërbyem. E sotmja po, por edhe e ardhmja do na gjykojë e japë të drejtë!”, tha Alibeaj.
Shefi i Politikës së Jashtme të Bashkimit Evropian, Josef Borrell, në një postim në “Twitter” për zgjedhjen e Bajram Begajt theksoi: “mezi presim të punojmë bashkë për një marrëdhënie të sigurtë dhe solide BE-Shqipëri, si anëtarë të familjes evropiane.”
Komisioneri për Fqinjësinë dhe Zgjerimin e BE, Oliver Varhelyi, e uroi Presidentin e ri të Shqipërisë, Bajram Begaj, “mezi pres të punojmë së bashku për të çuar përpara Shqipërinë në rrugën e saj të integrimit në BE”, shkruan komisioneri Varhelyi në median sociale.
Ambasada e Shteteve të Bashkuara të Amerikës e uroni Bajram Begaj për zgjedhjen e tij si Presidenti i ardhshëm i Shqipërisë. “Ne presim me kënaqësi që të vazhdojmë të punojmë me të në detyrën e tij të re dhe të forcojmë më tej partneritetin midis vendeve tona”, thekson në një postim në median sociale Ambasada e SHBA në Tiranë.
Po ashtu edhe Ambasada gjermane në Tiranë uroi të shtunën, Bajram Begaj, për zgjedhjen e tij si Presidenti i ri i Republikës së Shqipërisë. “Zgjedhja e Presidentit qendron mbi politikën e ditës. Ajo krijon mundësinë unike për t’u angazhuar në shenjë të bashkimit si dhe – nisur nga sfidat, përpara të cilave gjendet Shqipëria – për të punuar në kapërcimin e llogoreve politike e për të mbështetur kulturën e bashkimit përtej partive. Në këtë kontekst i uroj z. Bajram Begaj shumë forcë e çdo të mirë”, thuhet në një deklaratë të ambasadës. /Lapsi.al/
