Tensione në Kuvend. Teksa ish-kryeministri Berisha po fliste nga foltorja e Kuvendit dhe po akuzonte qeverinë për lidhje me krimin dhe bandat e armatosura, është shënuar një incident mes Flamur Nokës dhe Erjon Braçes.
Në kohën kur po fliste Berisha, sipas demokratëve deputeti socialist po fliste nga vendi i tij, fjalë fyese në drejtim të ish-kryeministrit.
Kur ish kryeministri Berisha fliste nga vendi dhe po replikonte me Milena Hariton, Flamur Noka i ka kërkuar ministres që të mos e ndërpresë Berishën. Por nga ana tjetër e sallës, deputeti Braçe i është drejtuar Nokës me fjalët “boll o bo…”.
Në debat e sipër, Noka ka qëlluar me një objekt (letër) që ndodhej në tryezë, deputetin socialist Erjon Braçen.
Drejtuesja e seancës, Valentina Leskaj ka ndërhyrë duke thënë: Noka dil nga salla e Kuvendit, shkele ligjin…Ndërpritet seanca…!
Më pas ka ndërhyrë edhe Garda e Republikës.
Pas ngjarjes deputetët e PS kanë kërkuar përjashtimin e Nokës nga Kuvendi.
Kur rinisi seanca, zonja Leskaj tha se Noka përjashtohet nga punimet e Kuvendit për shkelje të rregullores.
Nga ana tjetër demokrati Edi Paloka tha se Leskaj po zbaton me njëanshmëri rregulloren dhe kërkoi përjashtimin e deputetëve socialistë Braçe dhe Balla.
Situata gjeneroi sërish tensione dhe Leskaj u detyrua të njoftojë edhe 5 minuta të tjera pushim.
