Ministria italiane e Punës dhe Politikave Sociale ka publikuar raportin e fundit mujor me të dhënat e minorenëve të huaj e të pashoqëruar nga prindërit, që brenda një muaji kanë hyrë në territorin italian.
Pas minorenëve ukrainas, afganë e egjiptianë, në renditjen e Ministrisë italiane në vend të katërt e të pestë janë pozicionuar ata me origjinë kosovare e shqiptare.
Brenda muajit prill 2022 në territorin italian kanë hyrë 60 minorenë kosovarë e 43 minorenë shqiptarë që kanë kërkuar strehim e shkollim në Itali, duke lënë pas ata që mbërrijnë nga vende si Pakistani, Gambia, Guinea, Bregu i Fildishtë, Eritrea etj.
Këto të dhëna bëhen akoma më preokupuese kur në renditjen e përgjithshme numri i minorenëve shqiptarë ka arritur më 1281 e 258 të tjerë janë kosovarë, kur vëtëm tre muaj më parë në janar të 2022 kjo renditje shënonte 1167 minorënë shqiptarë të strehua.
Sipas raportit të Ministrisë Italiane, lufta në Ukrainë ka ndryshuar hartën e kombësisë së minorenëve të huaj në Itali, duke renditur në vend të parë ata ukrainas.
Deri më sot janë 3906 minorenë ukrainas të marrë në mbrojtje nga qëndrat sociale të autoriteteve italiane e vetëm gjatë muajit prill 2022 kanë hyrë 1380.
Numri i përgjithshëm i minorenëve të huaj në Itali regjistron sot 14 025, e në ndarjen gjinore 83.7% e tyre janë meshkuj.
Sipas analizës së strukturave mbrojtëse ku strehohen këtë të rinj, është dokumentuar se 32 prej tyre janë vajza minorene shqiptare.
Italia me një ligj të vecantë i miratuar më vitin 017, Ligji Zampa, merr në mbrojtje e nuk lejon dëbimin nga territori i saj, emigrantë minorenë të huaj, pa prindërs që identifikohen apo kërkojnë strehim në strukturat e autoritett italiane.
Historikisht numri më i madh i tyre vijnë nga rruga Mesdhetare e që zbarkojnë me anije në Lampedusa, si dhe nga rruga Ballkanike ku ata shqiptarë e kosovarë janë më të shumtit në numër.
Ata strehohen në komunitete e qëndra sociale të vecantë nën kujdesjen e një tutori që ka përgjegjësinë ligjore për t’u kujdesur ndaj tyre.
Lufta në Ukrainë e shtimi i numrit të minorenëve ukrainas ka krijuar problematikën e kërkesës për tutorë e vullnetarë që kujdesen për emigrantët minorenë.
Rajoni i Lombardisë i cili regjistron dhe territorin me numrin më të lartë të strehimit të tyre, ka lëshuar gjatë orëve të fundit apelin e kërkesës për 500 tutorë më shumë në përballimin e rritjes së numrit të tyre në komunat rajonale.
E deri në gjetjen e tyre, përgjegjësia ligjore për strehimin e minorenëve të huaj e të pashoqëruar, është në kompetencën e drejtpërdrejtë të kryetarëve të bashkive.
/Ora News/
