Ambasadorët e Bashkimit Evropian miratuan të enjten, më 2 qershor paketën e gjashtë të sanksioneve të bllokut ndaj Rusisë, pas pushtimit të kësaj të fundit të Ukrainës.
Sanksionet përfshijnë një ndalim të pjesshëm të naftës: BE-ja ra dakord të ndalojë importin e naftës ruse të sjellë me anije – që përbën pjesën më e madhe të saj – por do të vazhdojë të importojë përmes tubacioneve, deklaroi një diplomat evropian për agjencinë e lajmeve Reuters.
Gjithashtu në paketën e gjashtë të sanksioneve përfshihet edhe heqja e huadhënësit kryesor rus, “Sberbank” nga platforma ndërkombëtare SWIFT. Sanksionet e miratuara vijnë pasi Hungaria i mohoi në mënyrë të përsëritur bllokut unanimitetin e nevojshëm të 27 vendeve të BE-së duke përshkallëzuar kërkesat e saj kombëtare.
Të enjten, tha diplomati, marrëveshja më në fund u bë e mundur pasi 26 vendet e tjera ranë dakord të hiqnin nga lista e zezë Patriarkun e Kishës Ortodokse Kirill, një aleat i ngushtë i Kremlinit, për të qetësuar Budapestin. Marrëveshja hyn në fuqi nesër në orën 07:00.
Edhe Shtetet e Bashkuara njoftuan të enjten sanksione të reja ndaj oligarkëve dhe elitave ruse, duke përfshirë disa nga njerëzit më të pasur në Evropë dhe familjet e tyre, si dhe ndëshkime për shumë zyrtarë të Kremlinit, biznesmenë të lidhur me presidentin Vladimir Putin dhe jahtet e tyre, avionët dhe firmat që i menaxhojnë ata.
Pjesë e listës është gjithashtu edhe Maria Zakharova, zëdhënësen e Ministrisë së Punëve të Jashtme ruse; Alexey Mordashov, një nga miliarderët më të pasur të Rusisë; dhe anëtarët e familjeve dhe subjektet e lidhura me oligarkët dhe zyrtarët.
Sanksionet kanë shënjestruar edhe Sergei Roldugin, një bashkëpunëtor i ngushtë i presidentit rus Vladimir Putin, i cili tashmë është nën sanksionet e BE-së.
Shtëpia e Bardhë tha në një deklaratë se sanksionet e fundit janë të dizenjuara për të rritur presionin ndaj presidentit rus Putin./REL
