Nga Boldnews.al
Drejtori i Autoritetit Rrugor Shqiptar, Evis Berberi, ka gjetur “zgjidhjen” për trafikun në rrugën e Rinasit!
Në fakt, ai do të “përdorë” një rrugë ekzistuese, për të cilën ka akorduar plot 400 milionë lekë. Një fond i majmë për rrugën vetëm 620 metra, e cila është krejtësisht e bërë, madje edhe me asfalt. Por, përse e gjithë kjo zhurmë për bërjen e një rruge ekzistuese dhe kujt po i shërben, propagandës së Ramës apo oligarkëve që ndërtojnë rrugë?
Natyrisht, tenderi i fundit i Berberit i ka vënë “vulën” vizionit të paktë që kanë shtetarët tanë, ata që na qeverisin, të cilët po i shohim dita-ditës duke na gllabëruar fondet publike. Marrëzia e tyre filloi me vendimin për vendosjen e një “trau” për automjetet që shkonin në Rinas nga qytetet veriore apo nga Kosova. Madje, “trau” detyronte banorët e zonës që të rrotulloheshin deri në Vorë apo Qafë-Kashar për të shkuar në shkollë, kopësht, apo edhe në banesat e tyre. U deshën protestat e drejta të banorëve që rruga të kthehej me dy sense lëvizje, ndërsa ministrja e Infrastrukturës ka deklaruar disa herë që do të ndërtojë një rrugë alternative për në Aeroportin e Rinasit.
Fjalët e ministres sollën pritshmëri të lartë për ndërtimin e një tjetër segmenti, i cili i shërbente kujtdo, pasi ndërtimi i rrugëve vetëm zhvillim sjell. Të gjithë prisnin se ku do të kalonte rruga, apo nëse do të shoqërohej edhe me trenin e premtuar. Por, ai që “ndihmoi” në maksimum Ballukun është Evis Berberi, drejtori i ARRSH-së. Ai gjeti zgjidhjen ideale: mjë rruge egzistuese! Të jetë menduar kaq shumë për rrugën ekzistuese? Nëse ka qenë, përse nuk e kanë shfrytëzuar më parë? Madje, rruga është e asfaltuar dhe e drejtë. Por, për këtë rrugë, Berberi i ARRSH-së, ka bërë tender. Sipas dokumenteve që disponon Boldnews.al, objekti i kontratës është “rehabilitim i rrugës së ish repartit ushtarak për në aeroportin e Rinasit”, ndërsa fondi i akorduar është 33,324,063 lekë pa TVSH, ose me TVSH shuma shkon në rreth 40 milionë lekë të rinj.
Në dokumentet e tenderit, të siguruara nga Boldnews.al, shkruhet se firma fituese ka 3 muaj kohë për të bërë funksionale këtë segment. Tenderi do të bëhet më datë 15 qershor, ndërsa sipas përllogaritjeve, rruga duhet të përfundojë në mes të shtatorit. Të paktën kështu shkruhet në letra, pasi firma fituese e ka gati rrugën, mjafton ta lidhë me rrugën kryesore. Në dokumente, ARRSH shkruan se si pasojë e shtimit të fluturimeve, që kapin shifrën e 1.9 milionë pasagjerëve në vit, u pa e arsyeshme ndërtimi i një rruge alternative për në Aeroport. “Në një distancë rreth 1280m përpara e të shkosh tek rrethrrotullimi i Rinasit, në afërsi të repartit ushtarak, mendohet të ndërtohet një rampë dalëse e cila do të lidhë segmentin rrugor mbikalimi i Kasharit – Aeroporti i Rinasit me rrugën ekzistuese reparti ushtarak – sheshi i parkimit të Aeroportit. Rruga ekzistuese nga sheshi i parkimit të Aeroportit, në vijë të drejtë në drejtim të repartit ushtarak, me një gjatësi prej rreth 620ml, ka gjerësi të shtresës së asfaltuar kaluese prej 7.5m me bankina të asfaltuara 2×1.5m. Gjendja e saj paraqitet e mirë” shkruhet në këto dokumente.
Pas hulumtimit të dokumenteve, redaksia e Boldnews.al bëri një kërkim super të thjeshtë në “Google Maps”. Siç duket edhe nga foto e mësipërme, rruga është ekzistuese, madje me asfalt. Ajo ka qenë e hapur për kalim, ndërsa ARRSH vetëm sa do të shtojë disa metra për ta lidhur me rrugëm Qafa e Kasharit – Rinas.
Në dokumente, ARRSH shkruan se “ndërtimi i kësaj rruge alternative do të lehtësojë sado pak trafikun e rënduar, pasojat e të cilit reflektohen më shumë në rrethrrotullimin e Rinasit”. Sipas saj, korsia hyrëse dhe segmenti rrugor i harkuar do të ndërtohet i ri (me një drejtim lëvizje), ndërsa pjesa e gjurmës ekzistuese do ti nënshtrohet një rehabilitimi të shtresave asfaltike. Pra, e gjithë ajo zhurmë për hiçgjë.
