Taulant Balla, kreu i Grupit Parlamentar socialist, u shpreh sot pas Konferencës së Kryetarëve, se opozita nuk duhet të bëjë gabim të bojkotojë seancën parlamentare të zgjedhjes së Presidentit.
Kuvendi pritet të mbajë seancën e zgjedhjes së Presidentit ditën e shtunë, 4 qershor, votim që do të përkojë me raundin e 4, ku Krreu i Shtetit zgjidhet me 71 vota.
Sipas Ballës, Kryesia e PS do të marrë një vendim mbi emrin e kandidatit, i cili më pas do ti përcillet edhe Grupit Parlamentar, që ka forcën e kartonave për ta miratuar kandidaturën që do të paraqitet.
“Vendimi i kryesisë së PS do të bëhet publik dhe natyrshëm duhet të jetë edhe aprovimi nga grupi parlamentar që do të votojë edhe presidentin”, tha Balla.
Ai u shpreh se Presidenti i Republikës mund të jetë burrë ose grua, por duhet që të mishërojë vlera të larta të integritetit publik, i ndryshëm nga Ilir Meta.
“Dëshira jonë ka qenë që ne ta zgjidhnim Presidentin me opozitën. I shpreha keqardhjen Alibeajt që nuk i bën nder PD që drejtohet prej tij që të kthehet në format e vjetra të bojkotit, që i ka dhënë shumë leksione cdo partie. Leksionet duhet të bëhen mësime. Bojkot të seancës parlamentare për çfarë? Mos e bëjnë të njëjtin gabim”, tha Balla.
