Peshëngritësja shqiptare Evangjelia Veli ka arritur rezultat historik, duke u shpallur Kampione Europe. Ajo ka fituar medaljen e artë në stilin e shkëputjes dhe në dygarë për peshën deri në 55 kg në Kampionatin Europian të Peshëngritjes që po zhvillohet në Tiranë.
Gjatë një interviste për Ora Sport Evangjelia Veli tregoi se si ndihet pasi u shpall Kampione Europe, kujt ia dedikon këto medalje si dhe tregoi dhe për lidhjen e saj me Shqipërinë ndërkohë që jeton në Greqi.
Gazetari: Si ndihesh pas fitimit të tre medaljeve, dy medalje të artë dhe një medalje e argjendtë?
Evangjelia Veli: Jam shumë e gëzuar, fillova dhe garën mbarë për Shqipërinë. Fitova medaljet e para. Shpresoj të vazhdojë kështu, Shqipëria të sjelli shumë medalje në këtë Europian. E gjithë ajo punë që kemi bërë po vlerësohet dhe kjo është një kënaqësi.
Gazetari: Kujt ja dedikoni këto medalje që keni fituar?
Evangjelia Veli: Në radhë të parë vetes time se kam punuar shumë, trajnerit tim, familjes time, njerëzve që më kanë ndihmuar, më kanë mbështetur dhe kanë besuar tek unë.
Gazetari: Në momentin kur po ekzekutohej himni kombëtar ju e vendosët dorën në një mënyrë të çuditshme, çfarë mesazhi donit të jepnit?
Evangjelia Veli: Unë ashtu e ndjej. Gjyshi dhe gjyshja ime kanë qenë në ushtri me Shqipërinë dhe unë ashtu e ndjej që ta mbaj dorën kur dëgjohet himni shqiptar. Është respekti që unë tregoj për himnin shqiptar dhe atë që ka bërë Shqipëria.
