Sekretari i Përgjithshëm i PS, Damian Gjiknuri, u shpreh në emisionin Top Story tha se mazhoranca nuk publikon emrat e kandidatëve për President pasi nuk do të dekurajojë opozitën në procesin e negociatave.
Gjiknuri tha se ne si PS mund të kemi një listë me emra por jemi në një proces negociatash, ndaj dhe është e pakuptimtë që ne të shkojmë me emrat tanë dhe të themi, na thoni edhe ju emrat tuaj.
“Kur bëhen negociata, i takonte opozitës që të vinte me dy apo 3 emra dhe të uleshim të diskutonim. Ky ishte edhe propozimi i Fatmir Mediut, i cili na rezulton si më i sakti në atë që tha në Konferencën e Kryetarëve. Publikimi i emrave nuk ka asnjë kuptim, pasi në fund të fundit, nëse do të hynim në këtë proces, atëherë le ta zgjedhim Presidentin nga populli. Tani me kaq kompetenca sa ka Presidenti, s´ka asnjë kuptim që të hedhim në treg emra”, tha Gjiknuri.
Sipas tij, e gjithë kjo situatë vjen sepse opozita nuk ka një lidership, që të unifikojë qëndrimin.
“Mbaj mend negociatat që janë bërë më parë, kam qenë pjesë e proceseve të negociatave, zhvillohen në nivel parlamentar dhe më pas secila palë konsultohet me lidershipet përkatëse”, tha ai.
