Nga Boldnews.al
Nëse ligji për ta do ishte i barabartë për të gjithë, më së paku Policia Bashkiake e Tiranës në katër ditët e fundit do kishte mbushur blloqet e gjobave ndaj tifozëve Holandez që erdhën për të parë ndeshjen e Konferenca Ligë mes Romës dhe Feinordit.
“Ndotin ambientin publik”-do ishte motivi, duke argumentuar më pas, e madje paraqitur prova me foto e video se: ‘pshurrën në muret e ministrisë apo të bashkisë’. Lek i madh do vlonte, por jo. Së pari çdo gjobë e prerë për “shpellarët evropianë”- do të thonte një “burrë me mend”, në krye të bashkisë, do ia prishte imazhin vendit.
Nuk dihet nëse kreu i Bashkisë së Tiranës ka folur me kryeinspektorin e Policisë Bashkiake Ermal Kapllani, për të bërë një “sy qorr” teksa u pshurrnin bashkinë tifozët e huaj. Gjithsesi alkimia mes tyre ka nisur që në vitin 2015, kur Kapllani u emërua si kryeinspektor i Policisë Bashkiake Tiranë. Preja më e lehtë ishte sulmi blic ndaj fshatarëve që shisnin sallatë apo presh poshtë cepave të pallateve. “Na prishin imazhin, sidomos tek të huajt” ishte argumenti kryesor, që gjithsesi e fshihnin me gjoja sigurinë ushqimore.
Tashmë është fakt. Policia Bashkiake është gjobëvënësja më e madhe, duke ia kaluar edhe asaj të rendit dhe policisë rrugore. Lek i thatë dhe prodhime fshati natyrale… Kush nuk paguan haraçin shembet në dru duke i degdisur edhe si të denocuar në prokurori për akuzën e “kundërshtimit për shkak të detyrës”. Shumat më të mëdha vijnë nga gjobat që u vendosen automjeteve.
Në fakt nuk konsiderohen si “masa administrative” efektive në përmirësimin e qarkullimit rrugor. Gjobiten masivisht automjetet e parkuara në zonat ku lejohet parkimi dhe nuk janë shqetësim për bllokim të qarkullimit. Plotësohen pafundësisht gjoba që variojnë nga 10 mijë deri në 20 mijë lekë të vjetra, me argumentin se nuk janë rezidentë.
Zakonisht qëndrojnë çift policësh, burrë-burrë e rrallë burrë-grua nën uniformën e Policisë Bashkiake. Për t’i dalluar është mjaft lehtë. Mbajnë gjithnjë në duar blloqe gjobash dhe shëtisin me fuoristradë, duke sekuestruar mallin e ndonjë qyqi fshatar që shet në cepat e pallateve. Pasi “krehin zonën”, sklifterat në uniformë futen skutë më skutë e pallat më pallat për të ngjeshur pas xhamave të automjeteve gjobat që rëndojnë xhepat e qytetarëve.
Shumë prej tyre nuk i lëvizin makinat për shkak të rritjes së çmimit të karburanteve, por kjo nuk do të thotë që do i shpëtojnë masave administrative që njihen si gjoba të gjobaxhinjve.
Ndonëse në Bashkinë Tiranë ka një zyrë të madhe propagandistike që policinë e konsideron si “mbështetëse të qytetarëve”, duke pozuar në shkolla kopshte e çerdhe si “herojtë e fëmijëve”, në fakt detyra e tyre është thjesht gjobëvënie. Në bllok shkruhet “maë administrative, në fakt është “TVL”, Ta ve Lali…
