Probleme serioze të rendit publik në Tiranë, për finalen e Konferencës së Ligës mes Romës dhe Feyenoord.
Një 45-vjeçar shqiptar ka mbetur i plagosur rëndë në kokë dhe është dërguar në spital. Ngjarja ka ndodhur në vendin ku ndodhej grupi i ultrasve holandezë. I plagosuri ndodhet në spital, por nuk rrezikon jetën.
Ky është një nga artikujt që shkruhet në mediat italiane, lidhur me incidentet që ndodhën në Tiranë, gjatë pasdites së sotme, ku disa mijëra holandezë dhe italianë kanë zbakrkuar në kryeqytetin shqiptar, për të ndjekur finalen e Ligës së Konferencës.
Nëntë tifozë të Feyenoord janë dërguar në komisariat për hetime: dyshohet se ata kanë sulmuar të riun shqiptar. Për momentin nuk ka asnjë kontakt mes grupit nga Roterdami dhe romanistëve.
Zona ku ndodhi ngjarja ishte e kufizuar dhe e ndaluar për publikun nga forcat e policisë lokale. Në mesin e operatorëve të sigurisë ka shqetësim për gjendjen e të plagosurit, i cili ka qëndruar i palëvizur në tokë për disa minuta nën sytë e shumë kalimtarëve.
“Zënka mes burrit dhe një grupi të holandezëve të dehur nisi kur shqiptari e pyeti se pse e shtynë. Ultrasit e Feyenoord reaguan me dhunë të madhe”, thuhet në artikull.
