Çaush Saliasi është efektivi i policisë i cili u ekzekutua nga kolegu i tij brenda ambienteve të Komisariatit nr 3 në Tiranë. Ngjarja e rëndë ka ndodhur mbrëmjen e së hënës, ndërsa viktima ndërroi jetë në spital si pasojë e plagëve të marra.
Efektivi i policisë që ka qëlluar mbi kolegun është arrestuar, ndërsa hetimet kanë nisur jo vetëm nga Agjensia e Mbikqyrjes Policore, por edhe Prokuroria e Tiranës.
Viktima Saliasi, i moshës rreth 55 vjeç, u qëllua nga efektivi Ludian Zaimi. Sipas informacioneve të para, brenda komisariatit janë dëgjuar 6 të shtëna. Autori i krimit, kishte rreth 1 vit që shërbente si Patrullë e Përgjithshme, ndërsa viktima ishte pjesë e policisë së shtetit prej 20 vitesh.
Efektivi që ka humbur jetën raportohet se është me origjinë nga Skrapari. Në vitin 2009 kur shërbente si punonjës policie në Kavajë ai ishte dyshuar për një rast tentative për marrëdhënie seksuale me një të mitur. Ngjarja, referuar raportimeve të kohës, ka ndodhur në një lokal, ndërsa efektivi u akuzua nga e mitura.
Policia në atë kohë nuk dha detaje për ngjarjen, por njoftonte arrestimin e efektivit të policisë, pas denoncimit të një vajze të mitur, e cila e akuzonte atë për tentativë përdhunimi. Por fakti që efektivi ka vijuar më pas të shërbejë po në Policinë e Shtetit, tregon de denoncimi ndaj tij ose nuk është provuar ose ka qenë trillim.
Tiranë/Informacion paraprak
Më datë 23.05.2022, rreth orës 21:20, në rrugën “Mine Peza”, në ambientet e Komisariatit të Policisë Nr. 3, në rrethana ende të paqarta, punonjësi i Policisë, shtetasi L.Z., ka plagosur me armë zjarri shtetasin Ç.S., të dy me detyrë oficerë të Patrullës së Përgjithshme.
Si pasojë e plagëve të marra, punonjësi i Policisë Ç.S. ka ndërruar jetë në spital.
Grupi hetimor nën drejtimin e Agjencisë së Mbikëqyrjes Policore (AMP) dhe Prokurorisë së Tiranës, ndodhet në vendngjarje dhe po punon për sqarimin e rrethanave të ngjarjes.
Autori i dyshuar është ndaluar dhe po kryhen të gjitha veprimet hetimore për zbardhjen e rrethanave të ngjarjes.
Në ambientet e Komisariatit nr. 3 kanë shkuar një grup i posaçëm nga Drejtoria e Përgjithshme e Policisë së Shtetit, përfshirë ekspertë të Drejtorisë së Standardeve Profesionale dhe nga Departamenti i Rendit dhe Sigurisë Publike.
Në përfundim të veprimeve të para hetimore do të ketë një njoftim më të plotë për media.
