Të gjithë e kujtojnë Kamzën e sezonit 2018/19. Pikërisht në marsin e vitit 2019, Kamza luante ndaj Laçit në shtëpi për llogari të Kategorisë Superiore, dhe kur po shkonte drejt fitores 1-0, arbitri Eldorian Hamiti akordoi penallti për laçjanët. Goli nga pika e bardhë në minutën e fundit, i hoqi fitoren kamzalinjve.
Drejtues të Kamzës nuk ishin dakord me vendimin e Hamitit dhe në përfundim të takimit e dhunuan në fushë. Federata vendosi dënimin e aktorëve të dhunës dhe zbriti Kamzën nga Superiorja, duke e dërguar në kategoritë inferiore. Kjo gjë solli shkrirjen e kamzalinjve që nuk e përballuan dënimin.
Së fundmi ka shkruar për Kamzën në rrjetet sociale një prej figurave më mbështetëse të këtij ish- klubi. Xhelal Mëziu, aktualisht deputet i Qarkut Dibër ka komentuar falimentimin dhe ka premtuar rikthimin e Kamzës në nivelet më të lart, për t’u shpallur kampion.
“Më 23 Maj 2017, për të dytën herë skuadra e Kamzës në futboll shpallet kampione e Kategorisë së parë dhe ngjitet për të dytën herë në Superligë!
Sot Kamza nuk ka skuadër futbolli as në Superligë, as në kategori të parë, apo të dytë apo të tretë, por është shkrirë si klub fal angazhimit të rilindjes.
Fal mbështetjes së Bashkisë 2007-2018, të Sponsorit Qarri dhe të qytetarëve, KF “Kamza” bëri një revolucion në 12 vite nga kategoria e tretë në Superligë.
Stadiumi i futbollit të Kamzës i ndërtuar me taksat e qytetarëve në qendër të qytetit të Kamzës, nuk luan Kamza se s’ka ekip.
Aty lozin ekipe të tjera nga Shqipëria por jo nga Kamza!
Është skandaloze, është e turpshme dhe e papranueshme kjo gjë, sporti më masiv, më popullor shuhet në Kamëz, nga rilindja!
Shumë shpejt do të rikthehet Kamza Kampione dhe ekipi i zemrës së qytetit të Kamzës!” shkruan Mëziu në rrjetin social Facebook.
