Ish-Kryeministri Sali Berisha, në kuadrin e turit për garën që zhvillohet të dielën, 22 mja, për kreun e PD, ka zhvilluar një takim me demokratët e Vlorës, nga ku shprehu mirënjohjen për mbështetjen që demokratët, të cilët i konsideroi njerëz të lirë, i dhanë lëvizjes së tij, të cilën e konsideroi një revolucion të pandalshëm.
Ashtu si edhe në takimet e mëparshme, Berisha vuri theksin në presionet që demokratët janë ndeshur në këto muaj, që mos i bashkoheshin lëvizjes së nisur në mesin e muajit shtator të 2021-it.
Berisha tha se demokratët mbështetën PD në një moment kritik PD dhe rithemeluan, ringritën në këmbë këtë parti, shpëtuan demokracinë dhe pluralizmin politik, por edhe të ardhmen e vendit.
“Ishte një udhëtim i pazakontë kjo që bënë demokratët, me vështirësi dhe pengesa të mëdha. U përballën me një qeveri, që mandatin e përdori për zëvendësimin e shtetit ligjor me narko-shtetin, ndërsa në mandatin e dytë u përpoq për të shkatërruar opozitën, për ta kthyer atë në pseudo-opozitë”, tha Berisha, duke shtuar se në mbështetje të Qeverisë ishte edhe mafia e George Soros.
Berisha tha se kjo mafie u përpoq ti emëronte opozitës kryetarin e saj, por demokratët u ngritën, pasi idealet e tyre ishin të paprekura. “Më 25 prill, 620 mijë shqiptarë votuan për PD, duke qenë forca më e madhe e dytë, në vendet ish-komuniste”, tha Berisha.
