Deputetët e Parlamentit Europian kërkon nisjen e negociatave me Shqipërinë dhe Maqedoninë e Veriut. Përmes dy raporteve të miratuar këtë të Enjten, deputetët vlerësuan përparimin që dy shtetet kanë bërë në rrugën drejt anëtarësimit në BE.
Në një njoftim për mediat të Parlamentit Europian, thuhet se deputetët i bënë thirrje Bashkimit Europian që të ketë parasysh implikimet historike në lidhje me sigurinë, para marrjes së vendimit, në kontekstin e agresionit rus në Ukrainë.
Deputetët thonë se të dy shtetet i kanë përmbushur kushtet, por përsëri nuk kanë marrë dritën jeshile dhe kjo ka minuar qëndrimin publik kundrejt Bashkimit Europian dhe procesit të zgjerimit. Deputetët kanë inkurajuar gjithashtu Bullgarinë dhe Maqedoninë e Veriut që të zgjidhin mosmarrëveshjet.
Në raportin për Shqipërinë, vendi shtyhet të intensifikojë përpjekjet për të bërë që sistemi i drejtësisë të jetë më efecient, të forcojë demokracinë, sundimin e ligjit dhe ekonominë. Gjithashtu, vendi ynë shtyhet që të forcojë shoqërinë civile, të luftojë korrupsionin dhe krimin e organizuar, të sigurojë lirinë e medias dhe të garantojë mbrojtjen e të drejtave të pakicave, përfshi edhe ato të komunitetit LGBTQI.
Raporti për Shqipërinë mori 519 vota pro, 52 kundër dhe 28 abstenime. Ai për Maqedoninë e Veriut mori 508 vota pro, 56 kundër dhe 35 abstenime.
