Gazetari Artan Hoxha është marrë në pyetje nga prokurorët e Belgjikës për çështjen ‘Toyota Yaris’, dosje për të cilën është nën hetim ish-kryetari i PD, Lulzim Basha.
Gazetari përmes postimit në rrjetet sociale thotë se u pyet për 4 orë për atë që dinte për çështjen.
“Katër orë brenda me federalët, për çështjen “Toyota Yaris”. Por se ç’u tha dhe se ç’u bë aty brenda, as dëgjova gjë dhe as mbaj mend gjë… po fare, fare”, shkruan Hoxha në rrjetet sociale.
Prokurorët belgë morën në pyetje në Tiranë, ish-kryetarin e PD, Lulzim Basha, për mbi dy orë, në 10 shkurt të këtij viti, në ambientet e SPAK.
Sipas prokurorëve belgë, Lulzim Basha nuk është vetëm dëshmitar i dosjes ‘Toyota Yaris’, por edhe i proceduar penalisht.
Basha akuzohet për dekonspirimin e operacionit policor, pas denoncimit në Kuvend se ishin nisur drejt Shqipërisë 5 milionë të fshehura në automjete.
Dy ditë pas deklaratës së Bashës, makinat Toyota Yaris, me 3.5 milionë euro të fshehura brenda tyre, mbërrijnë në Portin e Durrësit.
Asnjë prej kokave të trafikut nuk ra në pranga.
Hetimet belge janë përqendruar në atë që deklarata e Bashës në foltoren e Kuvendit u bë për interesa të një grupi kriminal, ndërsa një pjesë e parave, prej 1.5 milionë euro, humbën.
